14.12.2025 | 11:03
Փաշինյանը պատարագի է մասնակցում Այգեշատի Սուրբ Գևորգ եկեղեցում․ ՈՒՂԻՂ
Ղարիբաշվիլին Զելենսկիին խորհուրդ է տվել զբաղվել Ուկրաինայի հարցերով և չմիջամտել Վրաստանի ներքաղաքական կյանքին
Քաղաքականություն
13.03.2023 | 14:49
Վրաստանի վարչապետ Իրակլի Ղարիբաշվիլին Ուկրաինայի ղեկավարությանը խորհուրդ է տվել զբաղվել Ուկրաինայի հարցերով և չմիջամտել Վրաստանի ներքաղաքական կյանքին։ Ղարիբաշվիլին նման հայտարարություն է արել «Իմեդի» հեռուստաալիքին տված հարցազրույցում՝ մեկնաբանելով Թբիլիսիում ցուցարարներին աջակցող Ուկրաինայի ղեկավարության հայտարարությունները, փոխանցում է DS news-ը։
«Ուկրաինայում բարդ իրավիճակ է։ Էսկալացիա է սպասվում։ Մեր տեղեկություններով՝ Ուկրաինան հակահարվածներ է պատրաստում, հավանական է, Դոնեցկի մարզում ծանր մարտեր կլինեն, իսկ Բախմուտի գրավումից հետո, հավանաբար, է՛լ ավելի բարդ կլինի։ Դուք, իհարկե, հիշատակեցիք նաև Զելենսկիի ուղերձը, երբ մարտնչող մարդը դուրս է գալիս ու պատասխանում է ապակառուցողական ակցիային, որոնք տեղի են ունենում այստեղ՝ Վրաստանում, մի քանի հազար մարդու կողմից, դա ուղիղ վկայում է այն մասին, որ այդ մարդը կապ ունի, դրդապատճառներ ունի, որ այստեղ ինչ-որ բան տեղի ունենա»,- ասել է նա։
Վրաստանի վարչապետը նաև ասել է, որ ուկրաինական քաղաքական գործիչները «փնթի անհաջողականներ» են։
«Դուրս եկավ Կլիչկոն, դուրս եկավ Ֆեյգինը և ինչ-որ անհայտ անձինք՝ ուկրաինացի քաղաքական գործիչներ, Արախամիան և ինչ-որ փնթի անհաջողակներ, որոնք ասում են, որ փոփոխություններ են պետք, հեղաշրջում, իսկ դա ուղղակի միջամտություն է (երկրի քաղաքականությանը): Հիմա չեմ ցանկանում, մարդը (Զելենսկին) պատերազմի մեջ է, և ես ցանկանում եմ բոլորին հաջողություն մաղթել, պատերազմի դադար և խաղաղություն, երկրի միավորում, սակայն նախ հոգ տարեք ձեր ու ձեր երկրի մասին, մենք հոգ կտանենք մեր երկրի մասին։ Ես սա ցանկանում եմ ասել բոլորին»,- ասել է Ղարիբաշվիլին։
Հավելենք, որ Ուկրաինայի նախագահ Վլադիմիր Զելենսկին ավելի վաղ երախտագիտություն էր հայտնել վրաց ժողովրդին այն բանի համար, որ Թբիլիսիում ցուցարարները բողոքի ակցիաների ժամանակ բարձրացրել են Ուկրաինայի դրոշն ու երգել Ուկրաինայի հիմնը։ Պետության ղեկավարը նշել է, որ ուկրաինացիները Վրաստանին մաղթում են ժողովրդավարական և եվրոպական հաջողություններ։
Տաթև Ֆռանգյան
