Մարուքյանը՝ Հաջիևին․ «Հազարավոր մարդկանց անվտանգությունը ներքին խնդիր չի համարվում»

ՀՀ հատուկ հանձնարարություններով դեսպան Էդմոն Մարուքյանը թվիթերի իր էջում արված գրառմամբ անդրադարձել է Ադրբեջանի նախագահ Իլհամ Ալիևի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևի հայտարարությանը, ըստ որի՝ Ղարաբաղում բնակվող հայ բնակչության իրավունքների և անվտանգության հարցը բացառապես Ադրբեջանի ներքին գործն է, և Ադրբեջանն իր ինքնիշխանության հետ կապված հարցեր չի քննարկի երրորդ կողմերի, այդ թվում՝ Հայաստանի Հանրապետության։

«Հաջիևը պնդում է, որ ԼՂ հայերի անվտանգության և իրավունքների համար միջազգային մեխանիզմներ չեն լինի։ Նա պնդում է, որ դա Ադրբեջանի ներքին գործն է։ Կրկին պետք է հիշեցնեմ. Երկրորդ համաշխարհային պատերազմից հետո մարդու հիմնարար իրավունքներն ու ազատությունները, հազարավոր մարդկանց անվտանգությունը ներքին խնդիր չեն համարվում»,- գրել է Մարուքյանը։

Հաջիևը նաև հայտարարել էր՝ «Ղարաբաղի շուրջ ապառազմականացված գոտի ստեղծելու» և «ՄԱԿ-ի փաստահավաք առաքելություն Ղարաբաղ, Լաչինի ճանապարհ ուղարկելու» մասին հայ պաշտոնյաների հայտարարություններն անընդունելի են։ Ինչի՞ հիման վրա է Հայաստանը կոչ անում ՄԱԿ-ի կամ ԵԱՀԿ-ի առաքելություն ուղարկել այլ երկրի տարածք։ Առանց Ադրբեջանի համաձայնության ոչ մի կազմակերպություն չի կարող և չի գնա նման քայլերի։ ՄԱԿ-ի բանաձևերում հստակ ասվում է, որ ոչ մի առաքելություն չի կարող ուղարկվել ինքնիշխան պետության տարածք առանց նրա համաձայնության։  Ղարաբաղ և Լաչինի ճանապարհ առաքելություն ուղարկելու և արտաքին ուժեր ներգրավելու մասին Հայաստանի հայտարարությունները ոչ այլ ինչ են, քան ուտոպիա, աշխարհաքաղաքական արկածախնդրություն և արհեստական ​​լարվածության ստեղծում»։