24.11.2024 | 21:56
Միակն ու անկրկնելին. ՀՀ-ում Ֆրանսիայի դեսպանի արձագանքը՝ Ադրբեջանի տարածքային պահանջներին
Թուրքիան հայտարարել է, որ Շվեդիայի և Ֆինլանդիայի հետ հանդիպումը դրական է անցել
Քաղաքականություն
10.03.2023 | 13:52
Թուրքիայի նախագահի խոսնակ, գլխավոր խորհրդական Իբրահիմ Քալընը հայտարարել է, որ Թուրքիա-Շվեդիա-Ֆինլանդիա մշտական համատեղ մեխանիզմի հանդիպումը, ընդհանուր առմամբ, անցել է դրական մթնոլորտում, գրում է Անադոլու գործակալությունը։
Հանդիպումը տեղի է ունեցել նախօրեին ՆԱՏՕ-ի կենտրոնակայանում՝ դաշինքի գլխավոր քարտուղար Յենս Ստոլտենբերգի մասնակցությամբ։ Թուրքական պատվիրակության կազմում ընդգրկված են եղել Արդարադատության, Արտաքին գործերի, Պաշտպանության, Ներքին գործերի նախարարությունների և ազգային հետախուզական գործակալության ներկայացուցիչներ։
«Մենք ակնկալում ենք, որ Մադրիդում ստորագրված համաձայնագիրն ամբողջությամբ կիրականացվի։ Սա է մեր հիմնական ակնկալիքը ՆԱՏՕ-ին երկու երկրների անդամակցության գործընթացում»,- ասել է Քալընը։
Նա նշել է, որ հանդիպումը պետք է տեղի ունենար դեռևս երկու ամիս առաջ, սակայն Շվեդիայում Ղուրանի այրման ակցիայի պատճառով հետաձգվել է։
«Թուրքիայի անվտանգությունը նաև ՆԱՏՕ-ի անվտանգության մի մասն է։ Այսօր մենք հերթական անգամ քննարկեցինք PKK/PYD/YPG, FETÖ ահաբեկչական կազմակերպությունների՝ Թուրքիայի անվտանգության դեմ ուղղված գործունեությունը։ Անընդունելի է ահաբեկչական կազմակերպությունների ֆինանսավորումն ու քարոզչությունը դաշինք ձգտող երկրների տարածքներում։ Մենք ուշադիր հետևում ենք այս ուղղությամբ Շվեդիայի և Ֆինլանդիայի իշխանությունների գործողություններին։ Մենք միշտ աջակցել ենք ՆԱՏՕ-ի ընդլայնմանը։ Նույն կերպ մենք հիշում ենք Հյուսիսային Մակեդոնիայի՝ դաշինք մտնելու պատմությունը։ Հունաստանը երկրի անվան պատճառով շուրջ 10 տարի բողոքում էր այս երկրի՝ ՆԱՏՕ մտնելու դեմ»,- ասել է Թուրքիայի նախագահի մամուլի քարտուղարը։
Նա նշել է, որ Շվեդիայի և Ֆինլանդիայի անդամակցության հարցն այդ երկրների կառավարությունների ձեռքում է։
«Թուրքիայի, Շվեդիայի և Ֆինլանդիայի մշտական համատեղ մեխանիզմի հանդիպումն անցել է, ընդհանուր առմամբ, դրական մթնոլորտում։ Շվեդիայի և Ֆինլանդիայի գործընթացները միասի՞ն, թե՞ առանձին կլինեն՝ կախված է այն քայլերից, որոնք կձեռնարկեն այդ երկրները»,- եզրափակել է Քալընը։
Էմմա Չոբանյան
