16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Զապորոժիե ԱԷԿ-ը կրկին անցել է վթարային շահագործման, իրավիճակը սպառնալից է. ՄԱԳԱՏԷ-ի ղեկավար
Քաղաքականություն
09.03.2023 | 16:00
Ռուսական հերթական հրթիռային հարձակման ֆոնին ՄԱԳԱՏԷ-ի ղեկավար Ռաֆայել Գրոսսին զգուշացրել է, որ համաշխարհային մասշտաբով միջուկային աղետն ամեն անգամ ավելի է մոտենում, փոխանցում է BBC-ի ռուսական ծառայությունը:
«Այսօր առավոտյան տեղական ժամանակով առավոտյան 5-ի սահմաններում Զապորոժիեի ԱԷԿ-ը կորցրել է ամբողջ արտաքին հոսանքը, երբ վերջինի մնացած 750 կՎ լարման գիծն անջատվել է, միակ պահուստային 330 կՎ գիծը վնասվել է մի քանի օր առաջ և վերանորոգվում է»,- ասել է նա։
Պաշտոնյայի խոսքով՝ օբյեկտում ակտիվացված են բոլոր 20 վթարային դիզելային գեներատորները, որոնցից ութը էլեկտրաէներգիա են ապահովում ատոմակայանի համար, մնացածները գտնվում են սպասման ռեժիմում։
Գրոսսին ընդգծել է, որ պատերազմի սկզբից ի վեր վեցերորդ դեպքն է, երբ Զապորոժիեի ԱԷԿ-ն անցնում է վթարային շահագործման։ Արտաքին էլեկտրամատակարարումից կայանի վերջին ամբողջական անջատումը տեղի էր ունեցել անցյալ տարվա նոյեմբերի 23-ին։
Զապորոժիեի ԱԷԿ-ի շուրջ ստեղծված իրավիճակն այս պատերազմի ամենավտանգավոր պահերից է։ Կայանը ռուսական ուժերի վերահսկողության տակ է անցել ներխուժման առաջին օրերին։ ՄԱԳԱՏԷ-ի փորձագետները վաղուց ահազանգում են այն մասին, որ դրա տարածքում՝ միջուկային ռեակտորների անմիջական հարևանությամբ, Ռուսաստանի Դաշնության զինվորականներն անհասկանալի նշանակության օբյեկտներ են կառուցում։
Տաթև Ֆռանգյան
