15.01.2025 | 02:30
Միրզոյանն ու Բլինքենը նաև քննարկել են ՀՀ-ԵՄ գործընկերության խորացմանը միտված գործընթացը
Վրաստանի խորհրդարանի մարտի 9-ի և 10-ի լիագումար նիստերը չեղարկվել են՝ շենքի վնասման պատճառով
Քաղաքականություն
09.03.2023 | 14:00
Վրաստանի խորհրդարանում հինգշաբթի և ուրբաթ նախատեսված լիագումար նիստերը չեղարկվել են՝ մարտի 7-ին և 8-ին տեղի ունեցած անկարգությունների ժամանակ պատճառված վնասի պատճառով։ Այս մասին ասվում է օրենսդիր մարմնի տարածած հաղորդագրության մեջ, փոխանցում է Եվրոպեյսկայա պրավդան։
«Մարտի 7-8-ը խորհրդարանի շենքի մոտ հավաքված որոշ քաղաքացիների բռնի գործողությունների հետևանքով վնասներ են հասցվել խորհրդարանի շենքին և ենթակառուցվածքներին։ Ենթակառուցվածքներին հասցված վնասի պատճառով և ներսում գտնվողների առողջությանը սպառնացող վտանգներից խուսափելու համար այս շաբաթ լիագումար նիստեր չեն կայանա»,- ասված է հաղորդագրությունում։
Խորհրդարան մարդկանց մուտքի սահմանափակ ռեժիմ է գործելու. oրենսդիր մարմնի շենք մուտք կգործեն միայն այն անձինք, ովքեր կներգրավվեն վնասի գնահատման գործում, պարզաբանել են խորհրդարանից։
Հիշեցնենք, որ հազարավոր մարդիկ մարտի 7-ին և 8-ին Թբիլիսիում բողոքի ցույց են անցկացրել այն բանից հետո, երբ խորհրդարանն առաջին ընթերցմամբ ընդունել է «օտարերկրյա գործակալների» մասին օրենքի նախագծի վրացական տարբերակը։
Երկու հանրահավաքի մասնակիցներին էլ ուշ գիշերը ցրել են ուժայինները՝ կիրառելով ջրցան մեքենաներ և արցունքաբեր գազ։ Բողոքի երկու օրերի ընթացքում ավելի քան 130 մարդ բերման է ենթարկվել։
Մայրաքաղաքում տեղի ունեցած անկարգություններից հետո իշխող «Վրացական երազանք» կուսակցությունը որոշել է հրաժարվել նախագծի ամերիկյան տարբերակը դիտարկելուց։
Տաթև Ֆռանգյան
