Ռուսաստանը կրկին զանգվածային հրթիռային հարձակման է ենթարկել Ուկրաինային

Մարտի 8-ի լույս 9-ի գիշերը ռուսական զորքերը նոր զանգվածային հրթիռային հարձակում են իրականացրել Ուկրաինայի վրա։ Telegram-ի մի շարք ալիքների տվյալներով՝ «Իսկանդեր», «С-300», «Կալիբր», «X59», «X22» հրթիռների և անօդաչու սարքերի օգտագործմամբ հարձակումն իրականացվել է Սև և Ազովի ծովերի ջրերից, ինչպես նաև Ռուսաստանի Դաշնության Բելգորոդի շրջանից։ Ամբողջ Ուկրաինայում օդային տագնապ է հայտարարվել, գրում է DW-ի ռուսական ծառայությունը։

Ռուսական հրթիռների և անօդաչու սարքերի հարվածների հետևանքով Օդեսայի մարզում վնասվել է էներգետիկ ենթակառուցվածք և բնակելի շենքեր։ Այս մասին Telegram-ում հայտնել է Օդեսայի տարածաշրջանային ռազմական վարչակազմի ղեկավար Մաքսիմ Մարչենկոն։ Նրա խոսքով՝ տուժածներ չկան, էլեկտրամատակարարումը սահմանափակվել է։

Իր հերթին, Խարկովի քաղաքապետ Իգոր Տերեխովը գրել է քաղաքի որոշ շրջաններում մի շարք պայթյունների և էլեկտրաէներգիայի անջատումների մասին՝ նշելով, որ «էներգետիկ ենթակառուցվածքը հարվածի տակ է»։ Խարկովի վարչական շրջանի ղեկավար Օլեգ Սինեգուբովը մանրամասներ է հայտնել․ քաղաքում և շրջանում մոտ 15 հարված է հասցվել, ըստ նախնական տեղեկությունների՝ հարվածներից մեկը եղել է բնակելի շենքի վրա, զոհերի ու ավերածությունների մասին տեղեկությունները ճշտվում են։

Խմելնիցկիի վարչական շրջանի ղեկավար Սերգեյ Գամալին էլ Telegram-ում գրել է երկրի կարևոր ենթակառուցվածքներին հասցված հարվածների մասին՝ կոչ անելով չանտեսել օդային հարձակման նախազգուշացումը։

Կիևի մարզում, տեղի ռազմական վարչակազմի տեղեկություններով, գործել է հակաօդային պաշտպանությունը։ Ուկրաինական լրատվամիջոցները հայտնում են Սումիի, Ժիտոմիրի, Տերնոպոլի, Դնեպրոպետրովսկի, Զապորոժիեի մարզերում պայթյունների մասին։ Տեղեկացվում է, որ որոշ դեպքերում պայթյունների պատճառ կարող է լինել ՀՕՊ համակարգերի աշխատանքը։

Ռուսաստանի Դաշնությունը հարձակման համար նոր մարտավարություն է կիրառել՝ օգտագործելով կեղծ օդային թիրախներ, մասնավորապես՝ օդապարիկներ՝ Ուկրաինայի հակաօդային պաշտպանությանը մոլորեցնելու համար, գրում են ուկրաինական լրատվամիջոցները։

Ռուսական կողմից արձակված հրթիռների ստույգ թիվը հայտնի չէ։

Տաթև Ֆռանգյան