Քաղաքականություն
09.03.2023 | 13:43
Լատվիայի նախագահ Էգիլս Լևիտսը նախօրեին Բաքվում Ադրբեջանի նախագահ Իլհամ Ալիևի հետ բանակցություններից հետո հայտարարել է, որ Ռիգան հանդես է գալիս Հայաստանի և Ադրբեջանի հարաբերությունների կարգավորման օգտին՝ տարածքային ամբողջականության սկզբունքի հիման վրա, գրում են ադրբեջանական լրատվականները։
«Ինչ վերաբերում է Հարավային Կովկասի, Ադրբեջանի և Հայաստանի խաղաղության գործընթացին, ինչպես արդեն նշել եմ՝ մենք միջազգային իրավունքի վրա հիմնված կարգավորման կողմնակից ենք։ Իսկ միջազգային իրավունքը նշանակում է երկրների տարածքային ամբողջականություն»,- ասել է Լատվիայի նախագահը՝ նշելով, որ «հասել է ժամանակը նման խաղաղության պայմանագրի»։
«Կայուն խաղաղության կարելի է հասնել միայն այն դեպքում, եթե այն հիմնված լինի միջազգային իրավունքի և տարածքային ամբողջականության վրա»,- ասել է Լևիտսը։
Հարկ է նկատել, որ Լատվիայի պաշտոնյաների հայտարարությունները վերջին շրջանում ավելի շատ նման ադրբեջանական լոբբինգի ներկայացուցիչների վարքագծի։ Մասնավորապես, դեռ անցյալ տարի օգոստոսին, երբ Ադրբեջանը հերթական անգամ հարձակում էր իրականացրել Արցախի վրա, Լատվիայի փոխվարչապետ, պաշտպանության նախարար Արտիս Պաբրիկսն իր թվիթերյան պաշտոնական էջում կիսվել էր մի շարք գրառումներով, որոնք միակողմանի էին, բացահայտ ներկայացնում էին ադրբեջանական կողմի դիրքորոշումը և արդարացնում Բաքվի ագրեսիան։ Ավելի վաղ էլ Պաբրիկսն այցելել էր Արցախի գրավյալ հայկական Շուշի քաղաքը։
Էմմա Չոբանյան
