06.06.2026 | 19:05
Բիթքոյնը կորցնում է գրավչությունը․ ներդրողները նախընտրում են AI ընկերություններն ու խոշոր IPO-ները
Վրաստանն «օտարերկրյա գործակալների» մասին օրենքի նախագիծն ուղարկել է Վենետիկի հանձնաժողով
Քաղաքականություն
08.03.2023 | 18:57
Վրաստանը նախօրեին առաջին ընթերցմամբ ընդունված «Օտարերկրյա գործակալների մասին» օրենքի նախագիծն ուղարկել է Եվրախորհրդի Վենետիկի հանձնաժողով՝ վերլուծության։ Այս մասին մարտի 8-ին կայացած ճեպազրույցում հայտարարել է իշխող «Վրացական երազանք» կուսակցության նախագահ Իրակլի Կոբախիձեն, հայտնում է «Նովոստի-Գրուզիան»։
«Մի քանի ամսից օրինագծի վերաբերյալ կարծիք կստանանք Վենետիկի հանձնաժողովից, և միայն դրանից հետո կշարունակվի օրինագծի քննարկումը խորհրդարանում»,- ասել է նա։
Պատգամավորը սպեկուլյատիվ է համարել ընդդիմության այն պնդումները, թե «օտարերկրյա գործակալների» մասին օրենքի ընդունումը բացասաբար կանդրադառնա ԵՄ-ում Վրաստանի թեկնածուի կարգավիճակ ստանալու գործընթացի վրա։
Կոբախիձեն նաև ընդգծել է, որ բոլոր նրանք, ովքեր մարտի 7-ի ցույցերի ժամանակ խախտել են օրենքը, պետք է պատժվեն օրենքի ամբողջ խստությամբ։
Հիշեցնենք, որ Վրաստանի խորհրդարանի կողմից «օտարերկրյա գործակալների» մասին օրինագիծն առաջին ընթերցմամբ ընդունելուց հետո Թբիլիսիի կենտրոնում բողոքի ակցիաներ են սկսվել, որոնց ժամանակ ոստիկանությունը կիրառել է արցունքաբեր գազ և ջրցան մեքենաներ։
Տաթև Ֆռանգյան
