Շառլ Միշելը շատ է ցանկանում, որ Հայաստանի և Ադրբեջանի ղեկավարները նորից այցելեն Բրյուսել․ Տոյվո Կլաար

Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարն ադրբեջանական ԱՊԱ գործակալության հետ զրույցում խոսել է Բրյուսելում Հայաստանի և Ադրբեջանի ղեկավարների հնարավոր հանդիպման կազմակերպման մասին։

«ԵՄ խորհրդի նախագահ Շառլ Միշելի մոտեցումն այն է, որ երկու առաջնորդների վերադարձը Բրյուսել, անկասկած, կարևոր նշանակություն է ունենալու։ Խոսքը միայն Բրյուսելի մասին չէ, վերջին մի քանի ամիսներին Հայաստանի և Ադրբեջանի ղեկավարները որևէ հանդիպում չեն անցկացրել։ Մենք կարծում ենք, որ նրանց համար իսկապես կարևոր է պարբերաբար հանդիպել ու աշխատել կարևոր հարցերի շուրջ։ Այնպես որ՝ այս առումով նախագահ Միշելը շատ է ցանկանում, որ առաջնորդները կրկին գան Բրյուսել։ Մի քանի շաբաթ առաջ նա Մյունխենում հանդիպել է առաջնորդների հետ։ Ես գտնվում եմ Բաքվում, նախորդ շաբաթ Երևանում էի այդ հանդիպումների կապակցությամբ։ Հիմա մենք սպասում ենք, որ Հայաստանի ու Ադրբեջանի առաջնորդներն առաջիկայում կրկին հանդիպեն Բրյուսելում»,- ասել է Կլաարը։

Նա նշել է, որ առաջիկա հանդիպումն իրենց տեսակետից իրական նպատակ է։

«Մոտենում է Նովրուզը։ Կարծում եմ, որ սա նույնպես անպայման իր դերն է ունենալու այս գործընթացում։ Այնպես որ՝ ես չեմ ակնկալում, որ այն տեղի կունենա Նովրուզից առաջ, բայց, ի վերջո, իհարկե, կարող ենք հանդիպում ունենալ և կողմերին հարթակ տրամադրել այն անցկացնելու համար։ Միաժամանակ, նախագահ Միշելը կարող է հրավիրել առաջնորդներին ու նրանց ժամանակ տալ։ Իհարկե, ամենակարևորը նախագահ Ալիևի և վարչապետ Փաշինյանի ցանկությունն է՝ հանդիպել, պայմանավորվածություններ ձեռք բերել և ապահովել խաղաղություն Հայաստանի և Ադրբեջանի միջև, ընդհանուր առմամբ, Հարավային Կովկասում»,- ասել է ԵՄ հատուկ ներկայացուցիչը։

Էմմա Չոբանյան