08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Թուրքիայի քրդամետ կուսակցությունը կարող է աջակցել ընդդիմության միասնական թեկնածուին՝ ընդդեմ Էրդողանի
Քաղաքականություն
07.03.2023 | 20:09
Թուրքիայի քրդամետ Ժողովուրդների դեմոկրատական կուսակցությունը կարող է նախագահական ընտրություններում աջակցել ընդդիմության միասնական առաջնորդին։ Այս մասին հայտարարել է կուսակցության համահիմնադիր և ղեկավար Միտհաթ Սանջարը, գրում է Bianet-ը։
«Մենք ասել էինք, որ կսաջակցենք ընդդիմության թեկնածուին, եթե կոնսենսուս ձեռք բերվի ուղիղ բանակցությունների արդյունքում։ Հակառակ դեպքում տարբերակը պարզ է՝ մենք մեր թեկնածուին կառաջադրենք»,- ասել է Սանջարը Habertürk հեռուստաընկերության եթերում։
Կուսակցությունն ավելի վաղ հայտարարել էր, որ առանձին թեկնածուով է մասնակցելու ընտրություններին, իսկ ընդդիմադիր դաշինքի հետ համագործակցությունը կախված է նրանց թեկնածուից։ Վեց կուսակցություններից բաղկացած դաշինքը երեկ որպես միասնական թեկնածու առաջադրել է Ժողովրդահանրապետական կուսակցության (CHP) առաջնորդ Քեմալ Քըլըչդարօղլուին։
Շնորհավորելով Քըլըչդարօղլուին առաջադրվելու համար՝ Սանջարն ասել է. «Մենք ակնկալում ենք նրա այցը մեր շտաբ՝ քննարկելու այդ հարցերը»։
Նա նշել է, որ մտադիր են քննարկել ժողովրդավարական անցման սկզբունքները, ոչ թե բանակցել կուսակցության հետ։
Ի պատասխան՝ CHP-ի խորհրդարանական խմբի փոխնախագահ Օզգյուր Օզելը հայտարարել է, որ «նման այց հնարավոր է»:
«Նախագահի թեկնածուն կարող է այցելել բոլոր քաղաքական կուսակցություններին»,- ասել է նա։
Էմմա Չոբանյան
