Հասարակություն
07.03.2023 | 17:10
Երրորդ խմբի հաշմանդամություն ունեցող անձինք հնարավորություն կստանան օգտվել անվճար դեղեր ստանալու իրավունքից. Առողջապահության նախարարությունն առաջարկում է «Հաշմանդամություն ունեցող անձանց իրավունքների մասին» օրենքում փոփոխություն կատարել, ինչի արդյունքում շահառուների ցանկում ընդգրկված անձինք կապահովվեն 100 տոկոս անվճար դեղերով։
Օրենքում փոփոխություններ կատարելու անհրաժեշտությունը պայմանավորված է բնակչության դեղապահովման, բժշկական օգնության և սպասարկման որակը բարձրացնելու և մահացության ցուցանիշները նվազեցնելու նպատակով:
Մինչ այժմ 3-րդ խմբի հաշմանդամություն ունեցող անձինք դեղերը ստանում են 50 տոկոս զեղչով, այն դեպքում, երբ 1-ին և 2-րդ խմբի հաշմանդամություն ունեցող անձինք ունեն անվճար դեղեր ստանալու իրավունք:
«Նախագծի ընդունման դեպքում վերը նշված շահառուները կարող են օգտվել պետության կողմից ամբուլատոր-առաջնային օղակի միջոցով տրամադրվող անվճար դեղերի հատկացումից: Բացի այդ, օրենքի փոփոխությունը կբերի կարգավորող իրավական ակտերի համապատասխանեցման»,- նշվում է նախագծի հիմնավորման մեջ։
Հանրային քննարկման հարթակում տեղադրված նախագիծը, թեև ողջունվել է քաղաքացիների կողմից, սակայն նաև շեշտվում է՝ ԱՆ-ն պետք է ուշադրություն դարձնի դեղամիջոցների ցանկին.
«Շատ լավ նախագիծ է, բայց ուշադրություն դարձրեք նաև անվճար հատկացվող դեղերի ցանկին, հիմնականում ցածրորակ դեղեր են, որևէ արդյունք չտվող, էլ չասեմ,որ ցանկում չկան շահառուներին անհրաժեշտ (նշանակված) դեղերը»,- առաջարկությունների բաժնում գրել է քաղաքացի Կարեն Աբրահամյանը։
Գերատեսչությունը պատասխանել է, իր հերթին նշելով, որ «Հիմնական դեղերի ցանկ»-ը լրամշակվում է յուրաքանչյուր տարի` հաշվի առնելով առողջապահության նախարարությանը տրամադրվող ֆինանսական միջոցները.
««Հիմնական դեղերի ցանկ»-ը վերանայվում է Հայաստանի Հանրապետության առողջապահության նախարարության կողմից և հաստատվում է Հայաստանի Հանրապետության առողջապահության նախարարի հրամանով` հաշվի առնելով Առողջապահության համաշխարհային կազմակերպության երաշխավորությունները, Հայաստանի Հանրապետության առողջապահության նախարարի կողմից հաստատված բուժման ուղեցույցները, Ցանկում փոփոխություններ և լրացումներ կատարելու վերաբերյալ հայտերը և Հայաստանի Հանրապետությունում գրանցված դեղերի ցանկը: Տեղեկացնեմ նաև, որ դեղերի ձեռքբերումն իրականացվում է՝ հիմք ընդունելով գնումները կարգավորող իրավական ակտերը»,- նշված է ամբողջական պատասխանում։
Նախագիծն E-draft հարթակում կմնա մինչև մարտի 17-ը։
Ռոզա Վարդանյան
