27.06.2026 | 10:30
Մհեր Գրիգորյանը և Իրանի փոպնախագահը քննարկել են Հայաստան-Իրան երկկողմ օրակարգին առնչվող հարցեր
Կուտակային կենսաթոշակը 63 տարեկանից վաղ ստանալու նոր կարգավորումներ են առաջարկվում
Հասարակություն
07.03.2023 | 16:46
Առողջապահության նախարարությունը նոր նախագիծ է շրջանառության մեջ դրել՝ առաջարկելով «Կուտակային կենսաթոշակների մասին» օրենքում փոփոխություններ կատարել։ Օրենքում սահմանված է, որ կառավարության կողմից կազմված ցանկում ներառված հիվանդություններով հիվանդանալու (վիճակներում գտնվելու) դեպքում՝ առողջապահության բնագավառում կառավարության լիազոր մարմնի տված եզրակացության հիման վրա մասնակիցն իրավունք ունի ցանկացած ժամանակ, ներառյալ` նախքան կենսաթոշակային տարիքը լրանալը, ներկայացնելու իր կենսաթոշակային հաշվում առկա միջոցները՝ անկախ դրանց չափից ամբողջությամբ ստանալու պահանջ:
Ներկայում, գործող օրենսդրության համաձայն, յուրաքանչյուր դեպքի համար Առողջապահության նախարարի հրամանով ստեղծվում է մասնագիտական հանձնաժողով, որտեղ ներգրավվում են տարբեր բժշկական կազմակերպությունների բժիշկ-մասնագետներ, որոնց զբաղվածությունից ելնելով ոչ միշտ է հաջողվում արագ կազմակերպել հանձնաժողովի աշխատանքները, հետևաբար՝ առավել արագ արձագանքել քաղաքացու դիմումին:
Այս ձգձգվող գործընթացներին վերջ տալու և համակարգն ավելի հեշտացնելու համար, առողջապահական գերատեսչությունն առաջարկում է մասնակցին իր կենսաթոշակային հաշվում առկա միջոցներն ամբողջությամբ ստանալու պահանջ ներկայացնելու իրավունք տվող` հիվանդությունների ցանկում ներառված հիվանդություններով հիվանդանալու դեպքում, եզրակացության տրամադրման կարգը և գործառույթը վերապահել միասնական սոցիալական ծառայությանը:
«Նախագծի ընդունման արդյունքում նախատեսվում է կարգավորել մասնակցի կենսաթոշակային հաշվում առկա միջոցներն ամբողջությամբ ստանալու պահանջի դեպքում մասնագիտական եզրակացության տրամադրման հետ կապված հարաբերությունները»,- նշվում է նախագծում։
Նշենք, որ 2022 թ. հունվարի 1-ից մինչև դեկտեմբերի 31-ը ուսումնասիրվել է շուրջ 74 քաղաքացու դիմում, որի արդյունքում հիվանդությունների (վիճակների) ցանկին համապատասխանելու մասին Առողջապահության նախարարության թվով 31 եզրակացություն ներկայացվել է Հայաստանի կենտրոնական դեպոզիտարիա, իսկ 06.03.2023թ. դրությամբ առկա է 10 քաղաքացու դիմում, որից 2 դիմումի ուսումնասիրության գործընթացը ընթացքի մեջ է:
Առաջարկվող փոփոխության մասին նախագիծը հանրային քննարկման հարթակում կմնա մինչև մարտի 21-ը։ Այս պահին օրինագիծը իրավական ակտերի հրապարակման միասնական կայքում միայն «կողմ» ձայներ ունի ։
Ռոզա Վարդանյան
