12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Լուկաշենկոն հայտարարել է «Մաչուլիշչի» օդանավակայանի վրա ենթադրյալ դիվերսիայի մասնակիցների ձերբակալության մասին
Քաղաքականություն
07.03.2023 | 17:03
Բելառուսում ձերբակալվել են «ուկրաինական հատուկ ծառայությունների ահաբեկիչն ու նրա հանցակիցները», որոնք ենթադրաբար մասնակցել են «Մաչուլիշչի» օդանավակայանում դիվերսիոն գործողության փորձին։ Այս մասին հայտարարել է երկրի ղեկավար Ալեքսանդր Լուկաշենկոն, փոխանցում է BBC-ի ռուսական ծառայությունը։
Փետրվարի 26-ին բելառուս ակտիվիստները հայտնել են Մինսկի մերձակայքում գտնվող ռազմական օդանավակայանում դիվերսիա իրականացնելու մասին, որի արդյունքում, ինչպես նրանք են պնդում, վնասվել է ռադիոտեղորոշիչ հայտնաբերման A-50 ինքնաթիռը:
Մինչ այժմ Ռուսաստանի և Բելառուսի իշխանությունները կտրականապես հերքում էին, որ նման միջադեպ է տեղի ունեցել, սակայն շուտով հայտնի դարձավ, որ ինքնաթիռը լքել է Բելառուսը և տեղափոխվել Տագանրոգ՝ տեղական ավիաընկերությունում վերանորոգման համար։
Լուկաշենկայի խոսքով՝ ձերբակալվածն ունի ռուսական և ուկրաինական անձնագրեր և ուկրաինական հատուկ ծառայությունների կողմից հավաքագրվել է 2014 թվականին։
«ՏՏ մասնագետ կամ տեխնոլոգիաներից լավատեղյակ՝ նա պատրաստվում էր ահաբեկչական գործողություններ իրականացնել»,- ասել է Լուկաշենկոն։
Նրա խոսքով՝ անօդաչու թռչող սարքի հարվածի հետևանքով ռուսական ինքնաթիռը փոքր վնաս է ստացել։
«Բարեբախտաբար, օդանավն էական վնաս չի ստացել, բացառությամբ, ինչպես ասում են, քերծվածքներից և կորպուսի մեկ անցքից, ինչը չի խանգարում ռազմական ինքնաթիռին կատարել իր պարտականությունները։ Այնուամենայնիվ, մենք խնդրել ենք ռուսներին, որպեսզի վերցնեն այդ ինքնաթիռը տեխնիկական սպասարկման համար և մեզ մեկ ուրիշն ուղարկեն»,- ասել է Լուկաշենկոն։
Բելառուսի ընդդիմադիր BYPOL ասոցիացիան հայտարարել է, որ հարձակումն իրականացրել են բելառուս պարտիզանները, որոնց հաջողվել է լքել երկիրը։
Տաթև Ֆռանգյան
