Վեցերորդ վարչության աշխատակիցները ԵԿՄ-ի շենքում են. ՏԵՍԱՆՅՈՒԹ

Այս պահին Ոստիկանության վեցերորդ վարչության աշխատակիցները ԵԿՄ-ի շենքում են:

Հիշեցնենք, որ երեկ կալանավորվեց ԵԿՄ նախագահ, ԱԺ ՀՀԿ խմբակցության պատգամավոր Մանվել Գրիգորյանը: ԱԱԾ-ն Գրիգորյանի տունը խուզարկելիս հայտնաբերել էր մեծ քանակության զենք ու զինամթերք, զինվորների համար  ապրիլյան քառօրյային ուղարկված սնունդ:Մանվել Գրիգորյանին մեղադրանք է առաջադրվել ՀՀ քրեական օրենսգրքի 235 հոդվածի 1-ին եւ 2-րդ կետերով (ապօրինի կերպով զենք ռազմամթերք ձեռք բերելը կրել կամ փոխադրելը, որը կատարվել է մի խումբ անձանց կողմից նախնական համաձայնությամբ) ինչպես նաեւ ՀՀ ՔՕ 179 հոդվածի 3-րդ մասի 1-ին կետով (մի խումբ անձանց հետ նախնական համաձայնությամբ յուրացման եղանակով իր վստահությանը հանձնված առանձնապես խոշոր չափերով ուրիշի գույք հափշտակություն): 

Աշխատակիցներից ԵԿՄ պահեստազորի կապիտան Հասմիկ Գալոյանը մեզ հետ զրույցում ասաց, որ խուզարկել են հաշվապահությունը և պահեստը։ Հարցին, թե պահեստում զենքեր կան, ասաց չգիտի, բայց «տուշոնկաների» առկայությունը չբացառեց։

ԵԿՄ շենքում էին նաև ազատամարտիկները, նրանք համատեղ հայտարարությամբ հանդես եկան, որում դատապարտեցին «հրեշավոր արարքները»:

«Հանիրավի վարկաբեկվում է ԵԿՄ-ի ազնիվ և նվիրյալ ազատամարտիկների հեղինակությունը։ Ուստի հանդիպման մասնակիցներով առաջարկեցին ԵԿՄ արտահերթ համագումար անցկացնել և կասեցնել ԵԿՄ ֆինանսական գործունեությունը, անցկացնել անկախ աուդիտ», – հայտարարությունն ընթերցեց ազատամարտիկ Ռազմիկ Պետրոսյանը։

Մանրամասները՝ տեսանյությում։