05.11.2024 | 14:33
Պեսկովը հայտարարել է, թե Կրեմլը Մայա Սանդուին չի ճանաչում Մոլդովայի նախագահ
Բելառուսում Սվետլանա Տիխանովսկայային հեռակա կարգով 15 տարվա ազատազրկման են դատապարտել
Քաղաքականություն
06.03.2023 | 18:23
Բելառուսական ընդդիմության կողմից կեղծված համարվող 2020 թվականի նախագահական ընտրություններում Ալեքսանդր Լուկաշենկոյի գլխավոր մրցակից Սվետլանա Տիխանովսկայային Մինսկի դատարանը հեռակա կարգով դատապարտել է 15 տարվա ազատազրկման՝ մի շարք ծանր հոդվածներով, այդ թվում՝ պետական դավաճանության, գրում է BBC-ի ռուսական ծառայությունը։
Նա նաև մեղավոր է ճանաչվել պետական իշխանությունը զավթելու համար դավադրության, ծայրահեղական կազմավորում ստեղծելու և այն ղեկավարելու, ինչպես նաև պետական իշխանությունը զավթելու հրապարակային կոչեր անելու համար:
Դատավճռում ասվում է, որ նա պետք է պատիժը կրի ընդհանուր ռեժիմի քրեակատարողական գաղութում։
Նախագահական ընտրություններում կեղծիքների դեմ զանգվածային բողոքի ցույցերից առաջ Տիխանովսկայան աշխատել է որպես թարգմանիչ։ Ըստ հրապարակման՝ 2020 թվականի իրադարձություններն արմատապես փոխել են նրա կյանքը։ Սվետլանա Տիխանովսկայան մասնակցել է նախագահական ընտրություններին միայն այն պատճառով, որ ամուսնուն՝ գործարար և բլոգեր Սերգեյ Տիխանովսկուն թույլ չեն տվել մասնակցել դրանց։
Տիխանովսկայային գրանցել է ընտրական հանձնաժողովը, և նրա շուրջ համախմբվել են ընդդիմադիր ակտիվիստներ՝ այլ թեկնածուների կողմնակիցներ, որոնց թույլ չեն տվել մասնակցել ընտրություններին։ Առաջին հերթին դրանք բանկիր Վիկտոր Բաբարիկոն են (ձերբակալվել է ընտրություններից առաջ, այժմ բանտարկված է 14 տարի ժամկետով) և Hi-Tech Park-ի համահիմնադիր Սերգեյ Ցեպկալոն (այժմ արտագաղթել է Բելառուսից):
Պաշտոնական տվյալներով՝ 2020 թվականի օգոստոսի 9-ի ընտրություններում Ալեքսանդր Լուկաշենկոն հավաքել է ձայների 80,1%-ը, Տիխանովսկայան՝ 10,1%-ը։ Անկախ հաշվարկների տվյալները, սակայն, ցույց են տվել մոտավորապես հակառակ հարաբերակցությունը։
Եվրամիությունը, ԱՄՆ-ը, Մեծ Բրիտանիան և մի շարք այլ երկրներ չեն ճանաչել ընտրությունների պաշտոնական արդյունքները, իսկ Լուկաշենկոն չի ճանաչվել դրանց հաղթող։
Տաթև Ֆռանգյան
