ՌԴ ԱԳՆ-ն «լուրջ մտահոգություն է հայտնել» ԼՂ հակամարտության գոտում լարվածության աճի կապակցությամբ

ՌԴ ԱԳ նախարարությունը լուրջ մտահոգություն է հայտնել ԼՂ հակամարտության գոտում լարվածության աճի կապակցությամբ

«Մենք մեր լուրջ մտահոգությունն ենք հայտնում Լեռնային Ղարաբաղի հակամարտության գոտում լարվածության աճի կապակցությամբ։ Վերջին մի քանի օրերի ընթացքում հրադադարի ռեժիմի՝ ոչ մեկ անգամ խախտումներ են գրանցվել։ Մարտի 5-ին տեղի է ունեցել զինված միջադեպ, որի հետևանքով զոհեր են եղել և՛ հայկական, և՛ ադրբեջանական կողմից»,- ասված է ՌԴ ԱԳՆ պաշտոնական ներկայացուցիչ Մարիա Զախարովայի տարածած հայտարարության մեջ։

«Համառորեն կոչ ենք անում կողմերին՝ զսպվածություն ցուցաբերել և քայլեր ձեռնարկել իրավիճակը լիցքաթափելու համար։ Մենք վերահաստատում ենք Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի՝ Լեռնային Ղարաբաղի հակամարտության գոտում հրադադարի և բոլոր ռազմական գործողությունների դադարեցման մասին հայտարարության դրույթները խստորեն պահպանելու անհրաժեշտությունը»,- ասված է հայտարարության մեջ։

Ըստ Զախարովայի՝ ցանկացած հարց, որը վերաբերում է Ռուսաստանի խաղաղապահ զորակազմի պատասխանատվության գոտում անվտանգության և կյանքի ապահովման հետ, պետք է լուծվեն խաղաղ ճանապարհով՝ խաղաղապահների հովանու ներքո կողմերի միջև շփումներով։

«Միջադեպը ևս մեկ անգամ հաստատում է Ռուսաստանի, Ադրբեջանի և Հայաստանի ղեկավարների՝ 2020 թվականի նոյեմբերի 9-ի, 2021 թվականի հունվարի 11-ի և նոյեմբերի 26-ի, ինչպես նաև 2022 թվականի հոկտեմբերի 31-ի, այդ թվում՝ տարածաշրջանային հաղորդակցությունների ապաշրջափակման, հայ-ադրբեջանական սահմանի սահմանազատման և խաղաղության պայմանագրի նախապատրաստման հետ կապված եռակողմ հայտարարությունների դրույթների կատարման շուրջ Բաքվի և Երևանի բանակցություններին շուտափույթ վերադառնալու հրամայականը»,- եզրափակվում է ՌԴ ԱԳՆ պաշտոնական ներկայացուցչի հայտարարության մեջ։

Տաթև Ֆռանգյան