«Կարևոր է տարակարծությունը», «Պետք է չվախենան վարչապետի գրառումից». ԶԼՄ ղեկավարները՝ Նիկոլ Փաշինյանի գրառման մասին

Վարչապետ Նիկոլ Փաշինյանն օրերս իր ֆեյսբուքյան էջում անդրադարձել էր հեռուստաընկերությունների խնդրին և նշել, որ որոշ հեռուստաընկերություններ, օգտվելով խոսքի ազատության անսահմանափակ հնարավորությունից, որոշել են հակապետական քարոզչություն իրականացնել։

Վարչապետի այս գրառումը դարձավ քննարկման առարկա և ԶԼՄ-ների ղեկավարները փորձեցին հասկանալ՝ ով է իրականացնում հակապետական քարոզչությունը։ 

«Ազգ» օրաթերթի գլխավոր խմբագիր Հակոբ Ավետիքյանի համար վարչապետի գրառումն անորոշ է, քանի որ դրանում թիրախը հստակ ընդգծված չէր և չկար կոնկրետ հասցեատեր։

Այս անորոշությունից բացի, Հակոբ Ավետիքյանը հույս ունի որ վարչապետի գրառման մեջ տեղ է գտել լեզվի սայթաքում: «Ինձ զարմացրեց հակապետական բառը, հակապետականն այն է, որ պետությանը դավաճանում է, ես հույս ունեմ, որ վարչապետի մոտ լեզվի սայթաքում է։ Վարչապետը ցույց տվեց ջղայն ռեակցիա, որը լավ չէ, մանավանդ, այն մարդու համար, ով լրագրող է և անընդհատ անողոք քննադատության է ենթարկել գրեթե բոլորին»,- ասաց Հակոբ Ավետիքյանը և նշեց, որ կարևոր է տարակարծությունը։

Հակոբ Ավետիքյանը հիշեցրեց նաև վարչապետի տիկնոջ՝ Աննա Հակոբյանի խոսքը, ըստ որի, մամուլը պետք է քննադատի։ 

«Հրապարակ» օրաթերթի գլխավոր խմբագիր Արմինե Օհանյանն էլ, անդրադառնալով վարչապետի գրառմանը, նշեց․ «Երեկ լուրեր էին պտտվում։ Դիմեցինք վարչապետի խոսնակին, ասաց, ում ուղղված էր, հասկացել է։ Ես հատուկ  լսեցի Գեղամ Մանուկյանին՝ հասկանալու համար, թե նա ինչով կարող էր ջղայնացնել վարչապետին, և այնտեղ ես սուր բան չգտա»:

Արմինե Օհանյանը նշեց, որ հեռուստաընկերությունները պետք է փորձեն ազատ խոսքի իրենց իրավունքը վիճարկել և չվախենան վարչապետի գրառումից։