Մխիթարյանը բացառել է ազգային հավաքական վերադարձը․ որոշման պատճառների մասին կխոսի ավելի ուշ

Հայաստանի ֆուտբոլի ազգային հավաքականի նախկին ավագ Հենրիխ Մխիթարյանը «Պրոֆֆուտբոլը»-ին տված հարցազրույցում անդրադարձել է ազգային հավաքական վերադարձի հավանականության մասին հարցին։

«Կարծում եմ, որ ցավոք սրտի չի լինի։ Չեմ զղջում իմ որոշման համար, միշտ իմ որոշումներն ընդունել եմ սառը գլխով ու հանգիստ սրտով՝ չնայած, որ շատ դժվար է եղել այդ որոշումն ընդունելը։ Կարծում եմ, որ ավելի լավ է մեկ քայլ շուտ ավարտել կարիերադ, քան՝ երկու քայլ ուշ։ Սա այն դեպքն է, երբ արդեն զգացի, որ ժամանակն է։

Մանրամասն՝ խնդիրների ու դետալների մասին կխոսեմ արդեն, երևի, ֆուտբոլային կարիերայից հետո՝ չնայած, կարծում եմ, բոլորին հետաքրքիր է հիմա, բայց ավելի լավ կլինի, որ խոսենք հետո։ Ամեն ինչ կբացատրեմ, ամեն ինչ կպատմեմ։ Միակ բանը, որ կարող եմ ասել իմ ազգային հավաքականին, իմ երկրի հավաքականին հաջողություն մաղթելն է, որ առաջիկա խաղերում, հատկապես՝ Թուրքիայի դեմ և մնացած խաղերում հաջողության հասնեն։ Ժամանակն է եկել, որ արդեն նոր սերունդը, ջահել սերունդը իր վրա պատասխանատվություն վերցնի ու կարողանա ազգային հավաքականն իր հետևից տանել։ Տեսանք, որ վերջին մի քանի խաղերը շատ դժվարությամբ ստացվեցին, բայց մարզչի գալով, հուսամ, որ ամեն ինչ կշտկվի ու մեր տղաները շատ պատվով ու պատասխանատվությամբ հանդես կգան»,- ասել է Մխիթարյանը։

Հիշեցնենք՝ Հենրիխ Մխիթարյանն ազգային հավաքականում կարիերան ավարտելու մասին հայտարարեց 2021-ին։ 15 տարի հանդես գալով ազգային ընտրանու կազմում՝ նա մասնակցել է 95 հանդիպման, խփել 32 գոլ․ այս ցուցանիշով նա լավագույնն է։