Հունաստանի վարչապետը ներողություն է խնդրել գնացքների բախման հետևւանքով զոհվածների հարազատներից. բողոքի ցույցերը շարունակվում են

Հունաստանի վարչապետ Կիրիակոս Միցոտակիսը ներողություն է խնդրել երկաթուղային վթարի հետևանքով զոհվածների հարազատներից․ մարտի 1-ի գիշերը մարդատար ու բեռնատար գնացքների բախման հետևանքով զոհվել է 57 մարդ։

«Հունաստանում 2023 թվականին նման բան չպիտի լիներ, որ հակառակ ուղղությամբ ընթացող երկու գնացքներ հայտնվեին երկաթգծի նույն ուղղության վրա, և դա ոչ ոք չնկատեր»,- գրել է երկրի վարչապետը ֆեյսբուքյան իր էջում։

Մինչ այ,դ Հունաստանում շարունակվում են բողոքի ցույցերը, որոնք ուղեկցվում են ոստիկանության հետ բախումներով, գրում է BBC-ի ռուսական ծառայությունը։

Կիրակի Աթենքի փողոցներ են դուրս եկել հազարավոր ցուցարարներ։ Բողոքի ակցիայի մասնակիցները երկինք են բաց թողել հարյուրավոր սև օդապարիկներ՝ ի հիշատակ վթարի զոհերի։

Հունաստանի ոստիկանության գնահատականներով՝ կիրակի բողոքի ակցիաներին մասնակցել է շուրջ 12 հազար մարդ։ Ցուցարարներից ոմանք հրկիզել են աղբամաններ ու դյուրավառ նյութերով շշեր շպրտել։ Ի պատասխան՝ ոստիկանությունն արցունքաբեր գազ ու լուսաձայնային նռնակներ է կիրառել՝ ցուցարարներին Սահմանադրության հրապարակից դուրս մղելու համար։

Բողոքի ցույցերը շարունակվում են մարտի 2-ից։ Միաժամանակ, Հունաստանում սկսվել է երկաթգծի աշխատակիցների գործադուլը։ Արհմիությունների ղեկավարները հայտարարել են, որ վթարի պատճառ են դարձել քրոնիկական խնդիրներն ու մի շարք գործոնների համընկնումը, այդ թվում՝ անձնակազմի պակասն ու չաշխատող սարքավորումները։

Հույն երկաթուղայինները պնդում են, որ 2000 թվականից երկրի իշխանություններն ավելի քան 20 միլիարդ եվրո են ծախսել երկաթուղային ժամանակակից էլեկտրական համակարգերի վրա երթևեկության անվտանգությունն ապահովելու համար, սակայն նախագիծն այդպես էլ ամբողջությամբ չի իրականացվել, իսկ տեղադրված սարքավորումները չեն աշխատում։

Տաթև Ֆռանգյան