Քաղաքականություն
05.03.2023 | 12:03
Փետրվարի 6-ին Թուրքիայի հարավ-արևելքում տեղի ունեցած երկրաշարժի զոհերի թիվը հասել է գրեթե 46 հազարի։ Այս շաբաթ օրը հայտարարել է ներքին գործերի նախարար Սուլեյման Սոյլուն, փոխանցում է «ՌԻԱ Նովոստի»-ն։
«Երկրաշարժերի զոհ է դարձել 45968 մարդ, որից 4267-ը սիրիացի են»,- ասել է Սոյլուն հեռուստաալիքներով հեռարձակված ճեպազրույցում։
Նրա խոսքով՝ գրեթե մեկ ամսվա ընթացքում հետցնցումների թիվը գերազանցել է 13 հազարը։ Փլատակների հեռացման հետ միաժամանակ շարունակվում են վնասված շենքերի քանդման աշխատանքները։ Մասնավորապես, Անթաքիա քաղաքում ավերվել է շենքերի ավելի քան 58 տոկոսը։
Հիշեցնենք՝ Թուրքիայի հարավ-արևելքում գտնվող Քահրամանմարաշ նահանգում փետրվարի 6-ին 9 ժամ ընդմիջումով 7,7 և 7,6 մագնիտուդ ուժգնությամբ երկրաշարժեր են տեղի ունեցել։ Ցնցումները զգացվել են երկրի 11 նահանգներում և հարակից նահանգներում, այդ թվում՝ Սիրիայում։
Թուրքիայի իշխանությունները երկրաշարժն անվանել են «դարի աղետ»։
