Եթե ուժգին երկրաշարժ լինի` Կառավարության, ԱԺ-ի շենքերն առաջիններից են քանդվելու. Գրիգոր Ազիզյան․ ՏԵՍԱՆՅՈՒԹ

«Խորհրդային տարիներից ժառանգություն մնացած հին, մաշված շենքերը, որոնք Հայաստանում 90 տոկոս են կազմում, կա´մ պետք է քանդել, կա´մ ամրակայել. դրանք չեն համապատասխանում սեյսմիկ անվտանգության նորմերին և հնարավոր ուժգին երկրաշարժի դեպքում չեն կարող կանգուն մնալ: Ի դեպ, մեր Կառավարության, ԱԺ-ի, նախագահականի շենքերը ևս չեն համապատասխանում նորմերին. եթե ուժգին երկրաշարժ լինի, առաջնահերթ դրանք են վնասվելու, դրանք կանգուն չեն մնա, առաջին տուժողներից են լինելու: Ընդ որում, դրանք հուշարձան-շենքեր են»,- Factor TV-ի հետ զրույցում նման տեսակետ է հայտնում ճարտարագետ-շինարար, կոնստրուկտոր Գրիգոր Ազիզյանը:

Նա խոսում է նաև Հայաստանում նոր կառուցվող շենքերի, դրանց հետ կապված խնդիրների մասին. «Նոր կառուցվող շենքերը, ինչպես հները, չունեն անձնագիր. գույքագրում են տասնյակ տարիներով, պրոցեսի մասին անընդհատ լսում ենք, բայց արդյունք չկա: Նոր կառուցվող շենքերից շատերը չունեն բակային տարածք, օրինակ` «Գլենդել Հիլզ» թաղամասն ինձ համար սարսափելի մի տեղ է: Կարելի է մի շենքից մյուսը միմյանց սուրճ հյուրասիրել, այնքան կիպ և սխալ է կառուցված»:
Գրիգոր Ազիզյանը խոսում է նաև Երևանի` օր օրի փոխվող պատկերից, սկսած` առաջ եկող պատշգամբներից մինչև մանսարդներ.

«Մանսարդները, օրինակ, մեծ այլանդակություն են, պարզապես անթույլատրելի է դրանց գոյությունը, կա նաև ընդունված համապատասխան օրենք, որն արգելում է դրանց կառուցումը, սակայն հետևող չկա:

Մանրամասները` տեսանյութում:

Աննա Բաբաջանյան