09.06.2026 | 00:17
Մարկո Ռուբիոն շնորհավորել է Փաշինյանին
«Օսիպյանը կուռկուռի ձագա դառել». «Նիկոլին լարեք».«Սասնա ծռերի» հեռախոսազրույցների հրապարակումը դուր չեկավ փաստաբաններին
Հասարակություն
20.06.2018 | 12:35
Երևանի ընդհանուր իրավասության դատարանի Շենգավիթի նստավայրում այսօր շարունակվեց «Սասնա ծռեր» խմբի 10 անդամի գործով դատական նիստը:
Նիստի մեկնարկին փաստաբանները միջնորդեցին հետաձգել նիստը մինչ կներկայանա պաշտպան Տիգրան Եգորյանը, դատարանը, սակայն մերժեց և սկսվեց ապացույցների հետազոտումը: Մեղադրողը ներկայացրեց ձայնագրությունները, որոնք կատարվել են ՊՊԾ գունդը գրաված անձանց և գնդից դուրս գտնվող անձանց հեռախոսազրույցների ընթացքում: Հեռախոսազրույցներում մասնավորապես շեշտվում էին այն ժամանակվա Երևանի փոխոստիկանապետ Վալերի Օսիպյանի և դեռևս պատգամավոր Նիկոլ Փաշինյանի անունները:
«Սասնա ծռեր» խմբի անդամ Աշոտ Պետրոսյանի և դրսում գտնող Գնել անունով անձի միջև խոսակցությունից լսելի էր, որ Պետրոսյանն ասում է, թե իրենք ծեծել են Օսիպյանին, պոկել նրա պագոնները. «Լավ ա լինելու ցավդ տանեմ, նոր Վիտալի Բալասանյանն եկավ, սկզբից շատ հպարտ էր եկել, կզզցրել ենք։ Հիմա ներում-բեկում չկա, ծեծե՛լ, ջարդե՛լ դավաճաններին, էդ Նիկոլից սկսած։ Չես պատկերացնում մեր ուժը: Օսիպյանը, չես պատկերացնի, կուռկուռի ձագ ա դառել, արդարանում ա անընդհատ։ Ծեծել եմ, չափալախել եմ, պագոնները դեմս եմ դրել։ Համարյա լաց էր լինում»:
Այլ անձանց միջև տեղի ունեցած խոսակցության մեջ շեշտվում էր նաև Նիկոլ Փաշինյանի անունը: «Նիկոլին լարեք, վեկալեք կոխեք զիբիլի յաշիկը: Օսիպյանին փչացրել ենք, պագոնները պոկել»,- ՊՊԾ գունդը գրաված անձանցից մեկն ասում էր իր ընկերոջը:
Փաստաբաններին սա դուր չեկավ, նրանք դիմելով դատարանին ասացին. «Ի՞նչ է սրանով ապացուցվում, ի՞նչ են տալիս այս խոսակցությունները գործին»: Դատարանը, սակայն ասաց, որ այդ հարցերի պատասխանները պարզ կդառնա ապացույցների հետազոտման ավարտին միայն:
Դատական նիստրի դահլիճ եկան նաև Ժիրայր Սեֆիլյանն ու Սամվել Բաբայանը: Սեֆիլյանը չցանկացավ հարցերի պատասխանել, ասաց` հետո: Իսկ Սամվել Բաբայանն էլ, խոսելով Մանվել Գրիգորյանին մեղսագրվող արարքների մասին ասաց, որ իր համար սպասելի էր:
