ՌԴ ԱԴԾ-ն տեսանյութ է հրապարակել Բրյանսկի շրջանում «ուկրաինացի դիվերսանտների հարձակման» վայրից, որը մոնտաժված է

ՌԴ Անվտանգության դաշնային ծառայությունը (ԱԴԾ) հրապարակել է առաջին տեսանյութը Բրյանսկի շրջանում, իբր, «ուկրաինացի դիվերսանտների հարձակումից», որի մասին նախօրեին հայտարարել էին ռուսական իշխանությունները, գրում է Meduza-ն։

Ըստ լրատվամիջոցի՝ տեսանյութը մոնտաժված է։ Դրանում երկու ավտոմեքենա կա․ առաջին տեսանյութում երևում է «ՎԱԶ 2107» մակնիշի ավտոմեքենա է՝ հետնամասում փամփուշտների անցքերով և կոտրված ապակիներով, իսկ երկրորդում՝ «Նիվա» մակնիշի ավտոմեքենա, որի վրա, բացի ծակված անվադողերից, ակնհայտ վնաս չի երևում։

Երկու դեպքում էլ ավտոմեքենաների մեջ մահացածների մարմիններ են ցուցադրված։ Տեսանյութում «ՎԱԶ 2107»-ի շրջանակները ռետուշացված են, սրահում տեսանելի է արյան նման մի բան։ «Կարող ենք բացատրել» Telegram-ալիքը նկատել է, որ տեսանյութում մեքենան մի վայրում է կայանված, իսկ լուսանկարներում՝ մեկ այլ վայրում։

«Նիվա»-ն ներկայացված է կարճ տեսանյութում և երկու լուսանկարում։ Միևնույն ժամանակ, տեսանյութում մեքենան ճանապարհին է կանգնած, իսկ լուսանկարներում՝ խրամատի մեջ։ Առաջին լուսանկարում մեքենան նկարված է դրսից, երկրորդում՝ ներսից, որտեղ երևում է հանգուցյալի մեջքը։

«ՎԱԶ 2107»-ը նախկինում չի հիշատակվել Բրյանսկի շրջանում «դիվերսիայի» մասին հաղորդագրություններում։

ԱԴԾ-ի տեսանյութում ցուցադրվում են նաև ականների լուսանկարներ, ձեռքի հակատանկային նռնականետ և մեկ պարկուճ։ Այս լուսանկարներից միայն մեկում է տարածքը հայտնվել կադրում: Մնացած դեպքերում զենքերը նկարահանվել են մոտիկից։ Աղբյուրի փոխանցմամբ՝ հնարավոր չէ պարզել՝ արդյո՞ք լուսանկարներն արվել են անմիջապես դեպքի վայրում։

Հիշեցնենք, որ մարտի 2-ի առավոտյան Բրյանսկի շրջանի նահանգապետ Ալեքսանդր Բոգոմազը հայտնել էր, որ «Ուկրաինայի դիվերսիոն-հետախուզական խումբը» ներթափանցել է Լյուբեչանե գյուղ։ Նահանգապետի խոսքով՝ «դիվերսանտները» կրակել են մեքենայի վրա, սպանել տեղի բնակչին, վիրավորել տասը տարեկան երեխայի։ ՌԴ նախագահ Վլադիմիր Պուտինը սա որակել էր «ահաբեկչություն»։ Իսկ ահա Ուկրաինայի նախագահի գրասենյակը տեղի ունեցածը որակել է «դասական սադրանք»։

Էմմա Չոբանյան