«Կողմնակալ է և խեղաթյուրված»․ Անկարան դժգոհ է Թուրքիայի մասին ԱՄՆ Պետդեպի զեկույցից

ԱՄՆ Պետքարտուղարության ահաբեկչության վերաբերյալ զեկույցը զայրացրել է Անկարային, որը հայտարարում է, որ այն միտումնավոր խեղաթյուրում է Թուրքիայի քայլերը՝ ուղղված ահաբեկչությանը հակազդելուն, որն ուղղակի սպառնալիք է երկրի անվտանգությանը: Այս մասին հայտարարել է Թուրքիայի ԱԳ նախարարության պաշտոնական ներկայացուցիչ Թանջու Բիլգիչը, գրում է Անադոլու գործակալությունը։

Նա կոչ է արել ԱՄՆ-ին համերաշխություն ցուցաբերել Թուրքիայի հետ՝ երկու երկրների միջև դաշինքի ոգու լույսի ներքո, ինչպես նաև «ցուցաբերել սկզբունքային, հետևողական, վճռական և արդյունավետ մոտեցում ահաբեկչության դեմ պայքարում»։

«Թուրքիան շարունակում է պայքարել ահաբեկչական կազմակերպությունների դեմ, այդ թվում՝ PKK/PYD/YPG, DHKP-ի, FETÖ-ի և ԻԼԻՊ-ի գրոհայինների դեմ։ Անկարայի բոլոր գործողություններն այս ուղղությամբ հիմնված են օրենքի տառի վրա»,- ասել է թուրք դիվանագետը՝ նշելով, իբր, Թուրքիայի արդյունավետ ներդրումն ահաբեկչության բոլոր ձևերն ու դրսևորումները վերացնելու միջազգային ջանքերում։

Նա նաև ուշադրություն է հրավիրել այս փաստին, որ ԱՄՆ զեկույցում Սիրիական դեմոկրատական ուժերը, որոնց Անկարան համարում է PKK-ի ճյուղ ու ահաբեկչական կազմակերպություն, ներկայացվում են որպես ԻԼԻՊ-ի դեմ պայքարում ԱՄՆ-ի դաշնակից։

«Հատկապես տարօրինակ է, հիմնվելով լրատվամիջոցների չհաստատված հաղորդագրությունների վրա, զեկույցում տեղ տալ այն պնդումներին, թե Սիրիայում և Իրաքում Թուրքիայի հակաահաբեկչական գործողությունները հանգեցնում են քաղաքացիական զոհերի»,- հայտարարել է Բիլգիչը:

Անկարային դուր չի եկել նաև այն, որ զեկույցում քաղաքական դրդապատճառներով քայլեր են անվանվում պայքարը FETÖ-ի անդամների դեմ, որին Թուրքիան մեղադրում է 2016 թվականի պետական հեղաշրջման փորձ կազմակերպելու համար։

Էմմա Չոբանյան