15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
7 ամիս առաջ այրվածքներից մահացած զինծառայողի հարազատները փակել են Գյումրի-Երևան մայրուղին
03.03.2023 | 13:35
7 ամիս առաջ Սիսիանի դիրքերում տեղակայված վագոն-տնակում հրդեհից զոհված 19-ամյա ժամկետային զինծառայող, Ազատան գյուղի բնակիչ Պալյան Պողոսյանի հարազատներն այս պահին փակել են Գյումրի-Երևան մայրուղու Ազատանի հատվածը՝ պահանջելով Պաշտպանության նախարարից գալ ու պատասխան տալ իրենց «ինչուներին»։
Պալյան Պողոսյանի հայրը՝ Ջիվան Պողոսյանը, մեզ հետ զրույցում նշեց, որ այսօր իր որդին պետք է զորացրվեր, այսօր պիտի ուրախության օր լիներ իրենց ընտանիքում, մինչդեռ սգում են՝ այդպես էլ ոչ մի հստակ պատասխան չստանալով, թե, ի վերջո, ինչ էր կատարվել վագոն-տնակում։
«Վերին աստիճանի անտարբերություն, կարծես ոչինչ չի եղել, այսօր իմ երեխես տուն պիտի գար, քրեական գործը տեղից չի շարժվում։ Ոչ մի արձագանք չկա, ուզում ես վարչապետի կամ պաշտպանության նախարարի հետ հանդիպել, ոչ մի ընդունելություն։ Իմ բողոքը Նիկոլ Փաշինյանի ու Սուրեն Պապիկյանի դեմ է, էս երկուսը պիտի պատասխան տան, իրենք պիտի դատվեն»,- հայտարարեց Ջիվան Պողոսյանը։
Հարազատները ոստիկանների հորդորով ժամանակավորապես բացեցին ճանապարհը, նրանք այս պահին Սուրեն Պապիկյանից սպասում են հեռախոսազանգի, ասում են՝ եթե նախարարի պատասխանը բավարարեց իրենց, կդադարեցնեն բողոքի ցույցը, այլապես նորից կփակեն ճանապարհը։
Հիշեցնենք, ողբերգական դեպքը տեղի էր ունեցել 2022 թվականի հուլիսի 17-ի գիշերը։ Զինծառայողը վառարանից բռնկված հրդեհից քնած վիճակում այրվածքներ էր ստացել, որոնց հետևանքով հուլիսի 26-ին մահացել էր։
Արմիկ Մովսիսյան
