06.06.2026 | 16:10
Դատախազությունը զգուշացնում է՝ վարժական հավաքից խուսափելը հանցագործություն է. այն պատժվում է 1-3 տարի ժամկետով ազատազրկմամբ
«Փախչող» գեներալը․ Վահե Ղազարյանը ոչ մի ասուլիս չի տվել, չի պատասխանում նաև լրագրողների հարցերին․ ՏԵՍԱՆՅՈՒԹ
Քաղաքականություն
02.03.2023 | 20:29
Օրերս ՔՊ-ական պատգամավորների հետ հանդիպման համար ԱԺ եկած ներքին գործերի նախարար Վահե Ղազարյանը մեծ արագությամբ «փախավ», որ չլսի ոստիկանների կողմից «Եռաբլուր»-ում որդեկորույս մայրերին բռնության ենթարկելու և համակարգի բարեփոխումների տապալման մասին լրագրողների հարցերը և հարկատուներին հաշվետվություն չտա, թե ինչո՞ւ ոստիկանության բարեփոխումները կյանքի չեն կոչվում սպասված ծավալով։ Ղազարյանը խորհրդարանից հեռանում է լրագրողների համար ոչ հասանելի ելքով։
Վահե Ղազարյանը ՆԳ նախարար է նշանակվել 2023 թվականի հունվարի 9-ին, իսկ մինչ այդ՝ շուրջ երեք տարի, զբաղեցրել է ՀՀ ոստիկանապետի պաշտոնը։ Այս ժամանակահատվածում Նիկոլ Փաշինյանի ընկեր Վահե Ղազարյանն աշխատել է որևէ կերպ չշփվել լրագրողների հետ․ նա ոչ մի անգամ մամուլի ասուլիսով հանդես չի եկել, նաև չեն եղել հարցազրույցներ, անգամ ՝ պետական լրատվամիջոցներին տրված։
ԻՔՄ ՀԿ ծրագրերի համակարգող Դանիել Իոաննիսյանի խոսքով՝ ՆԳ նախարար Վահե Ղազարյանը բարեփոխումների գաղափարն ու մոտեցումները չի կիսում և այն անձ չէ, որը կարող է ապահովել թափանցիկ գործող և հանրային ակնկալիքները բավարարող ոստիկանություն։
Նշենք, որ երբ քննարկվում էր ՆԳՆ ստեղծելու գաղափարը, կառավարությունը և Արդարադատության նախարարությունը բարձրագոչ հայտարարություններով էին հանդես գալիս, թե սա բխում է ժողովրդավարության և հաշվետվողականության սկզբունքերից։ Սակայն ՆԳ նախարարի հանրային հաղորդակցության մակարդակը մնում է շատ ցածր, ինչպես եղել էր ոստիկանապետ եղած տարիներին։ Նրա և քաղաքացիների միջև կապը խզված է, Վահե Ղազարյանը որևէ կերպ չի անդրադառնում հասարակությանը հուզող խնդիրներին։
ՆԳ նախարարը նախօրեին ԱԺ-ում պատասխանել էր միայն ՔՊ-ական պատգամավորներից մեկի այն հարցին, թե ինչո՞ւ է դադարեցվել ոստիկանությունում տեսախցիկների տեղադրման գործընթացը։ Ի դեպ, պատգամավորները Վահե Ղազարյանին սկսեցին հարցեր ուղղել միայն նրա հետ ունեցած փակ հանդիպումից հետո, իսկ մինչ այդ ՔՊ-ականները պայմանավորվածություն են ունեցել նախարարին չանհանգստացնել։
Արդարադատության նախարար Գրիգոր Մինասյանն ասում է՝ Վահե Ղազարյանը խիստ ժողովրդավար է։ Հակաժողովրդավարական բազմաթիվ դրսևորումներով հայտնի ՀՀԿ-ի նախկին անդամ, ներկայում արդարադատության նախարարի պաշտոնը զբաղեցնող Գրիգոր Մինասյանի լավատեսությունը, սակայն, քաղհասարակության ներկայացուցիչ Դանիել Իոաննիսյանը չի կիսում։
Ոստիկանությունը չբարեփոխելու փաստն արձանագրում է անգամ իշխող «Քաղաքացիական պայմանագիր» խմբակցության պատգամավոր Անդրանիկ Քոչարյանը։
Ի դեպ, Նիկոլ Փաշինյանը վարչապետի պաշտոնը ստանձնելուց հետո պարբերաբար հայտարարում է Հայաստանի՝ ժողովրդավարական պետություն լինելու, կառավարության թափանցիկ աշխատելաոճի մասին, սակայն հենց վարչապետը հաճախ հասանելի չի լինում լրատվամիջոցներին և արդեն շուրջ մեկուկես տարի նաև խոսնակ չունի։ Վահե Ղազարյանը, հավանաբար, փորձում է պաշտոնավարել այդ նույն տրամաբանությամբ։
Մանրամասները՝ տեսանյութում։
Նարեկ Կիրակոսյան
