Ես չեմ խոսում, գործում եմ` ի տարբերություն շատերի. Տիգրան Ավինյան․ ՏԵՍԱՆՅՈՒԹ

Երևանի քաղաքապետարանում քաղաքական թիմ է գործում և խնդիրների լուծման արդյունավետությունից ելնելով՝ տարբեր տեղեր տարբեր մարդիկ են աշխատում։ Կառավարության նիստից հետո լրագրողների հետ ճեպազրույցում այս մասին նշեց Երևանի փոխքաղաքապետ Տիգրան Ավինյանը՝ պատասխանելով հարցին, թե ինչու է Երևանի քաղաքապետը երկրորդ պլան մղվել, և բոլոր տեղերում ու նաև լուսանկարներում հենց Ավինյանն է, և Կառավարության այսօրվա նիստին ևս մասնակցում էր ոչ թե Երևանի քաղաքապետ Հրաչյա Սարգսյանը, այլ Տիգրան Ավինյանը։

«Հաշվի է առնվում կառավարության հետ իմ աշխատանքի մեծ փորձը, ես երեք տարի աշխատել եմ փոխվարչապետ և շատ լավ պատկերացնում եմ, թե ինչպես են աշխատում նախարարությունները»,- նշեց փոխքաղաքապետը։

Հարցին, թե քաղաքապետը չի՞ պատկերացնում այդ ամենին՝ Ավինյանը պատասխանեց, թե Երևանի քաղաքապետը կառավարությունում չի աշխատել և միգուցե ավելի քիչ է պատկերացնում կառավարության ներսի պրոցեսները։

Դուք այդքան խոսում եք, որ ձեր ռեյտինգը բարձրանա՞․ Ապարանի հարցից դուք եք խոսում, կրթության հարցերից դուք եք խոսում․ այս դիտարկմանն ի պատասխան՝ Ավինյանը նշեց․ «Ես չեմ խոսում, ես գործում եմ, ի տարբերություն շատ-շատերի։ Ապարանի հարցից ես եմ խոսում, որովհետև նույն ներդրողն առաջարկել է Երևանում նախագիծ, և ես տեղյակ եմ նախագծից։ Ես առաջարկում եմ ոչ թե խոսքին ուշադրություն դարձնել, այլ՝ գործին, կենտրոնանալ գործի վրա»։

Նշենք, որ Երևանի փոխքաղաքապետ Տիգրան Ավինյանը Երևանի ավագանու սպասվելիք ընտրություններում քաղաքապետի իշխանական թեկնածուն է և վերջերս բավական ակտիվ է, բազմաթիվ միջոցառումների է մասնակցում։

Մանրամասները՝ տեսանյութում։