20.03.2026 | 14:28
Իսրայելում զինծառայող է ձերբակալվել Իրանի օգտին լրտեսելու կասկածանքով
Ադրբեջանի ԱԳ նախարարն ու Իրանի ԱԳ փոխնախարարը քննարկել են դեսպանատան վրա հարձակումը
Քաղաքականություն
02.03.2023 | 11:55
Իրանի փոխարտգործնախարար Մահդի Սաֆարին հանդիպել է Ադրբեջանի ԱԳ նախարար Ջեյհուն Բայրամովի և նրա տեղակալի հետ՝ քննարկել Թեհրանում Ադրբեջանի դեսպանատան վրա հարձակումը, գրում է Մեհր գործակալությունը։
Նշվում է, որ հանդիպմանը Սաֆարին իր ցավակցությունն է հայտնել Ադրբեջանի կառավարությանն ու ժողովրդին և դեսպանատան միջադեպի հետևանքով զոհվածների ընտանիքներին, իսկ վիրավորներին մաղթել շուտափույթ ապաքինում։ Հանդիպմանը Սաֆարին նաև զեկույց է ներկայացրել դեսպանատան վրա հարձակման վերաբերյալ, նաև կոչ է արել այդ գործով երկու երկրների փորձագետների այցեր կազմակերպել։
Իրանցի դիվանագետը նաև հայտարարել է , որ միջադեպի բոլոր ասպեկտները պարզաբանելու և արդարադատություն իրականացնելու համար Թեհրանը պատրաստ է համագործակցել Ադրբեջանի համապատասխան կառույցների հետ։
Հավելենք, որ իրանական պատվիրակությունը Ադրբեջանում է՝ մասնակցելու COVID-19-ի դեմ պայքարի Չմիավորման շարժման կոնտակտային խմբի գագաթնաժողովին։
Հիշեցնենք, որ հունվարի 27-ին Իրանում Ադրբեջանի դեսպանատան վրա հարձակման հետևանքով 1 մարդ զոհվել է, կան վիրավորներ, հարձակվողին ձերբակալել են։ Պաշտոնական Բաքուն դեսպանատան վրա իրականացված հարձակումն «ահաբեկչություն» է որակել։ Հարձակման վերաբերյալ Թեհրանի քրեական դատախազի պաշտոնակատարն ասել է, որ զինված անձը Թեհրանում Ադրբեջանի դեսպանատան վրա հարձակվել է անձնական դրդապատճառներով։ Միջադեպից հետո Բաքուն տարհանել է Թեհրանում Ադրբեջանի դեսպանատան աշխատակիցներին, և այս պահին դեսպանատան գործունեությունը դադարեցված է։
Էմմա Չոբանյան
