Ադրբեջանից արձագանք դեռ չունենք․ Փաշինյանը՝ խաղաղության պայմանագրի Հայաստանի առաջարկի մասին․ ՏԵՍԱՆՅՈՒԹ

Ադրբեջանին է փոխանցվել խաղաղության պայմանագրի մեր տարբերակը, բայց դեռ արձագանք չկա: ԱԺ – Կառավարություն հարցուպատասխանի ժամանակ նշեց վարչապետ Նիկոլ Փաշինյանը՝ անդրադառնալով հարցին, թե արդյոք խաղաղության պայմանագրի վերաբերյալ հայկական կողմի առաջարկներին Ադրբեջանի կամ ԵԱՀԿ ՄԽ համանախագահ երկրների կողմից արձագանք եղել է:

«Երբ մենք էլ ստանում ենք նմանատիպ փաստաթուղթ, դրա արձագանքի ձևավորումը տևում է որոշակի ժամանակ, և ենթադրում եմ, որ որոշակի ժամանակից հետո ինչ-որ արձագանք կլինի, բայց նաև ուզում եմ ասել, որ այս ընթացքում տեղի է ունեցել խաղաղության պայմանագրի շուրջ աշխատանքի երեք շրջափուլ. նրանք են առաջարկել, մենք ենք արձագանքել, և այդպես 3 անգամ, և աշխատանքն այդ ուղղությամբ պետք է շարունակենք:

Ընդ որում՝ ուզում եմ ընդգծել, որ անկախ առերես հանդիպումներից, այդ աշխատանքները նաև իրականացվում են, այսինքն՝ փաստաթղթային աշխատանքներ են իրականացվում, և այդ աշխատանքները միշտ չէ, որ պահանջում են առերես հանդիպում, վերջերս, օրինակ՝ նաև ադրբեջանական կողմին ենք փոխանցել սահմանների սահմանագծման հանձնաժողովների աշխատանքի կանոնակարգի նախագիծ և նաև դրա արձագանքին ենք սպասում, իսկ այն առաջարկները, որոնք մենք արել ենք նախկինում, կոմունիկացիաների բացման վերաբերյալ, սահմանային անվտանգության ապահովման վերաբերյալ, այս բոլոր առաջարկները շարունակում են մնալ ուժի մեջ»,- նշեց վարչապետը:

Մանրամասները՝ տեսանյութում։