27.06.2026 | 06:03
ԱԱ-2026. Իսպանիան հաղթեց Ուրուգվային, Կաբո Վերդեն նույնպես դուրս եկավ փլեյ-օֆֆ. ՏԵՍԱՆՅՈՒԹ
Փաշինյանը պիտի՛ ներողություն խնդրեր զոհերի ծնողներից. Մարտի 1-ը չբացահայտվեց, հուշարձանով փակեցին գործը․ Ժաննա Ալեքսանյան․ ՏԵՍԱՆՅՈՒԹ
Քաղաքականություն
01.03.2023 | 20:47
Այսօր արդեն Մարտի 1-ի արյունալի իրադարձությունների 15 տարին լրացավ, և փաստն այն է, որ որևէ մեկը պատասխան չտվեց ո՛չ կատարված սպանությունների համար, ո՛չ էլ քաղաքական պատասխանատուներն օրենքի և դատարանի առաջ պատասխան տվեցին։
Իրավապաշտպան Ժաննա Ալեքսանյանից հետաքրքրվեցինք՝ ո՞րն է սրա պատճառը։ Ըստ նրա՝ այսպիսի հանգուցալուծումները կայանում են քաղաքական որոշումների արդյունքում, երբ հանցագործությունները չեն բացահայտվում, չեն ազատազրկվում պատասխանատուները։
«Քաղաքական որոշումները կանխում են իրավունքի, իրավական գործընթացները։ Տեսանք, թե ինչպես արդարացվեց Ռոբերտ Քոչարյանը և չգիտեմ՝ դրա հետևից ինչպիսի՞ գործընթաց է գնում, արդյո՞ք մինչև ՄԻԵԴ կգնան Մարտի 1-ի գործի բացահայտմանը հետևող մարդիկ։ Այդ մարդը՝ Քոչարյանը, իրեն լիովին արդարացված է զգում, և փորձում էին դա տարածել մեզ վրա։ Նա անգամ չի ցավակցել զոհերի ընտանիքներին։ Փաստորեն, որևէ իշխանություն չի բացահայտել այս գործը, ոչ միայն Սերժ Սարգսյանը։ Իսկ Նիկոլ Փաշինյանն այսօր պնդում է, որ բացահայտված է գործը, բայց տեսաք՝ չի կարող ոչինչ ասել պատասխանատուների մասով»,- ասաց իրավապաշտպանը։
Երևանի կենտրոնում քաղաքապետարանին հարակից այգում՝ այն վայրերում, ուր 15 տարի առաջ թեժ ներքաղաքական իրադարձություններ էին, այսօր բացվեց Մարտի 1-ի զոհերի հիշատակը հավերժացնող հուշարձանը։ Նիկոլ Փաշինյանը, ՀՀ և ԱԺ նախագահները մասնակցում էին այդ արարողությանը։ Փաշինյանը բացմանը Factor TV-ի հարցերին պատասխանեց, հայտարարեց, թե Մարտի 1-ը բացահայտված է, բայց մեղավորները դեռևս պատժված չեն․ «Այն, որ մինչև հիմա Մարտի 1-ի մարդասպանները հայտնաբերված չեն, դա չի նշանակում, որ այդպես չի լինի»։
Եվ Փաշինյանն ասել է, որ ամենամեծ խնդիրը եղել է այն, որ 2008-ից մարտի 1-ից հետո նախաքննությունը ոչ միայն ջանքեր չի գործադրել բացահայտելու հանցագործությունները, այլև հակառակն են արել՝ դժվարացրել են բացահայտումը, օրինակ՝ փոխելով կրակված փամփուշտները։
Արձագանքելով՝ Ժաննա Ալեքսանյանն ասաց, որ Նիկոլ Փաշինյանը պետք է ներողություն հայցեր զոհերի ընտանիքներից, որ Մարտի 1-ի գործը նրա իշխանության օրոք չի բացահայտվել, փոխարենը, ըստ իրավապաշտպանի, հուշարձանի տեղադրումով իշխանությունը փորձում է փակել Մարտի 1-ի գործը։
Հարցազրույցն ամբողջությամբ՝ տեսանյութում։
Ռոբերտ Անանյան
