Տպավորությունս դառն էր․ Փաշինյանը՝ ժողովրդագրական իրավիճակի ուսումնասիրության մասին․ ՏԵՍԱՆՅՈՒԹ

ՀՀ կառավարության անդամները պատասխանում են ԱԺ պատգամավորների հարցերին։

Ազգային ժողով-կառավարություն հարց ու պատասխանի ժամանակ վարչապետ Նիկոլ Փաշինյանն անդրադարձավ ժողովրդագրական իրավիճակի ուսումնասիրությանը և երեկ կառավարությունում ժողովրդագրական խնդիրների շուրջ անցկացված քննարկմանը։

«Տպավորությունս ընդհանուր առմամբ դառն էր, որովհետև ժողովրդագրական վիճակի հետ կապված բոլորիս հայտնի խնդիր ունենք արդեն շատ երկար ժամանակ։

Բայց նաև լավ նորությունն այն էր, որ հետազոտության արդյունքներն ասում են, որ եթե մենք ճիշտ քաղաքականություն վարենք, կարող ենք ժողովրդագրական դինամիկայի մեջ էական, շոշափելի և տեսանելի փոփոխություն մտցնել։ Հիմնական մոտեցումն այն է, որ ժողովրդագրական վիճակի բարելավման համար կարևոր հանգամանքը որակյալ կյանքի, միջավայրի և ենթակառուցվածքի ստեղծումն է։ Հարցը նույնիսկ հասավ քաղաքական քննարկման՝ արդյոք մենք հաշվարկե՞լ ենք, թե խաղաղությունն ինչ ազդեցություն կունենա, պատերազմն ինչ ազդեցություն կունենա»,- նշեց վարչապետը։

Փաշինյանի հավաստմամբ՝ շարունակվում է աշխատանքը ժողովրդագրական ռազմավարության մշակման ուղղությամբ։

Փաշինյանը նշեց, որ այս ոլորտում երկու դիտարկում կա. «Մենք շատ դեպքերում տեսնում ենք, որ ծնելիության վրա ազդեցություն ունենալու գործիքներով մենք երբեմն չգիտակցելով երեխայի ծնունդը ընտանիքի համար դարձնում ենք սոցիալական ինչ-որ գումար ստանալու միջոց: Բայց ռազմավարական տրամաբանությունն այն է, որ երեխայի ծնունդը մենք դարձնենք ընտանիքի երջանկության, արժեքների, հավատի արգասիք, որ նրան սպասվում է լավ ապագա:

Ժողովրդագրության առումով կարևոր նշանակություն ունի, պայմանական ասած, ակտիվ ծերության հանգամանքը: Մենք օրենսդրական որոշակի փոփոխություններով փորձում ենք այնպես անել, որ կենսաթոշակային տարիքի մեր հայրենակիցներին մաքսիմալ ակտիվ վիճակում պահենք: Բայց դրա համար մի պայման կա, նրանք պետք է առողջ լինեն»,- նշեց վարչապետը։

Մանրամասները՝ տեսանյութում։