16.01.2026 | 22:00
Վթար Էջմիածին-Երևան ճանապարհին. 4 տուժած հոսպիտալացվել է
Դելիում մեկնարկել է G20-ի ԱԳ նախարարների գագաթնաժողովը․ ուշադրության կենտրոնում են Ուկրաինայի պատերազմը և դրա ազդեցությունն աշխարհի վրա
Քաղաքականություն
01.03.2023 | 14:37
Աշխարհի առաջատար երկրների արտաքին գործերի նախարարները հավաքվում են Դելիում՝ G20-ի երկօրյա գագաթնաժողովին, որի ընթացքում Ուկրաինայում տիրող իրավիճակը կդառնա քննարկման հիմնական թեմաներից մեկը, փոխանցում է BBC-ի ռուսական ծառայությունը։
Հաղորդվում է, որ դիվանագետները, մասնավորապես, կքննարկեն, թե ինչպես է Եվրոպայում պատերազմն անդրադառնում աշխարհի մնացած մասի վրա, և ինչ լրացուցիչ դժվարությունների են հանդիպում աղքատ զարգացող երկրները։
Գագաթնաժողովում մամուլի ուշադրության կենտրոնում են ԱՄՆ պետքարտուղար Էնթոնի Բլինքենը և ՌԴ ԱԳ նախարար Սերգեյ Լավրովը։ Երկուսն էլ Դելի են ժամանել մեկ օր առաջ։
Վերջին անգամ Բլինքենն ու Լավրովը նույն սենյակում են եղել անցած տարվա հուլիսին Բալիում G20-ի գագաթնաժողովի ժամանակ: Այն ժամանակ, ինչպես դեպքի վայրում եղած ականատեսներն են պատմել, Լավրովը դուրս է եկել սենյակից, երբ հայտնվել է Բլինքենը։
Նրանց վերջին պաշտոնական հանդիպումն էլ տեղի է ունեցել 2022 թվականի հունվարին՝ Ուկրաինա ռուսական ներխուժումից մի քանի շաբաթ առաջ։
Լրագրողները և արևմտյան դիվանագետներն ուշադիր հետևում են, թե նրանք ինչպես են իրենց պահում Դելիում:
Հնդկաստանի հրավերով հանդիպմանը կմասնակցեն նաև G20-ի անդամ չհանդիսացող քսան երկրների ներկայացուցիչներ։
Գագաթնաժողովի օրակարգային այլ թեմաների թվում են համաշխարհային տնտեսական աճի խնդիրները, էներգակիրների ու պարենային ապրանքների գնաճը, ինչպես նաև ամբողջ աշխարհում ապրանքների և ծառայությունների պահանջարկի անկումը։ Այս ամենը, ըստ հանդիպման հայտարարությունների, ուղղակիորեն առնչվում են ուկրաինական պատերազմին։
Տաթև Ֆռանգյան
