Թուրքիայի աղետը կանխատեսած հոլանդացի գիտնականը ՌԴ-ի համար «մեգաերկրաշարժ» է կանխատեսել մարտի սկզբներին

Հոլանդացի սեյսմոլոգ Ֆրենկ Հուգերբիթսը, որը նախազգուշացրել էր Թուրքիայում և Սիրիայում ավերիչ երկրաշարժի մասին, Solar System Geometry Survey-ի (SSGEOS) YouTube-յան ալիքում ասել է, որ մարտին նոր ցնցումներ կարող են հարվածել Հեռավոր Արևելքի ռուսական տարածքներին, փոխանցում է ՌԻԱ Նովոստին:

Ըստ հետազոտողի՝ մարտի 2-ին և 5-ին Երկրի, Մերկուրիի և Սատուրնի կրիտիկական երկրաչափական մերձեցման պատճառով, արդեն մարտի 3-4-ին կամ մարտի 6-7-ին, Երկիրը կարող է «մեգաերկրաշարժի» ենթարկվել՝ 8,5 և ավելի բարձր մագնիտուդով։

«Շատ ավելի ակնհայտ տատանում է կրկին դրսևորել Խաղաղ օվկիանոսի արևմտյան հատվածը: Կամչատկայից, Կուրիլյան կղզիներից և հյուսիսում՝ Ճապոնիայից, Ֆիլիպիններում, ինչպես նաև Սուլավեսիի, Հալմահերայի, հնարավոր է նաև Ինդոնեզիայում՝ Բանդա ծովում: Այն կարող է նշանակալից դառնալ մինչև մարտի 3-ը կամ 4-ը»,- ասել է Հուգերբիթսը:

Միաժամանակ, նա այս շրջանների բնակիչներին հորդորել է սեյսմիկ ակտիվության դեպքում պլան պատրաստել։

«Մարտի առաջին շաբաթը շատ կարևոր է լինելու, մենք կարող ենք տեսնել ուժեղ կամ շատ ուժեղ սեյսմիկ իրադարձություն, սա մի բան է, որը բոլորին պետք է բարձր զգոնության մեջ դնի: Եթե դուք գտնվում եք սեյսմավտանգ գոտում, ապա ձեզ միշտ անհրաժեշտ է երկրաշարժի հետ կապված արտակարգ իրավիճակների պլան: Անկախ կանխատեսումից՝ ձեզ երկրաշարժի պլան է պետք։ Երբ գետինը սկսում է ցնցվել, դուք պետք է կարողանաք շատ արագ դուրս գալ տնից կամ շենքից: Դա կյանք կփրկի»,- պարզաբանել է գիտնականը։

Փետրվարի 3-ին Հուգերբիթսը կանխատեսել էր, որ «վաղ թե ուշ» Թուրքիայի հարավում՝ Սիրիայի հետ սահմանին, 7,5 մագնիտուդով նման աղետ կլինի։ Արդեն փետրվարի 6-ին Թուրքիայի հարավ-արևելքում գտնվող Քահրամանմարաշ նահանգում ինը ժամ ընդմիջումով 7,7 և 7,6 մագնիտուդով երկրաշարժեր տեղի ունեցան։

Տաթև Ֆռանգյան