Հասնում է աբսուրդի․ բանավեճ՝ պատգամավորների միջև․ ՏԵՍԱՆՅՈՒԹ

Ազգային ժողովում քննարկվում է «Ընտանիքում բռնության կանխարգելման և ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրենքում լրացումներ կատարելու մասին նախագիծը, որով առաջարկվում է օրենսդրական կարգավորում՝ միտված ընտանիքում բռնության ենթարկված անձանց պաշտպանության առավել արդյունավետ գործիքակազմ ունենալուն․ նախատեսվում է օգտագործել էլեկտրոնային հսկողության միջոցներ։

«Քաղաքացիական պայմանագիր» խմբակցության պատգամավոր Մարինա Ղազարյանը նշեց, որ Մարդու իրավունքների պաշտպանության և հանրային հարցերի մշտական հնձնաժողովը դրական եզրակացություն է տվել նախագծին և հորդորեց կողմ քվեարկել։

Նշենք, որ էլեկտրոնային սարքավորումների ձեռբքերման համար պահանջում է որոշակի ֆինանսական միջոցներ. շուրջ 200 շղթայի հավաքածու ձեռք բերելու համար կպահանջվի մոտ 560 միլիոն դրամ:

«Հայաստան» խմբակցության պատգամավոր Արմենուհի Կյուրեղյանը հարց ուղղեց, թե ինչու է հենց 200 շղթայի հավաքածու ձեռք բերվելու։ Արդյո՞ք լուրջ ուսումնասիրության արդյունքում է հայտաբերվել 200 դեպք։

«Մենք պարտավոր ենք այնպիսի միջավայր ստեղծել, որ բռնություններն ընտանիքներում կանխարգելվեն,- պատասխանեց Ղազարյանը՝ հավելելով, որ փորձագետները նշել են, որ Հայաստանում արձանագրվել է ընտանեկան բռնության 200 դեպք, բայց հնարավոր է, որ այդպիսի դեպքերն ավելի շատ լինեն։

Պատգամավորների միջև վեճ ծագեց։ «Դուք ասում եք 200 դեպք։ Եթե այդ 200 թիվը դուրս է բերվել Ֆրանսիայի, Կանադայի փորձի ուսումնասիրությունից, դա աբսուրդ է»,- ասաց Կյուրեղյանը։

Ղազարյանն արձագանքեց․ «Դուք այնպիսի հարց եք տալիս, որ դա հասնում է աբսուրդի։ Պարզ է, որ այդ 200 թիվը ես չեմ տվել, ես չեմ իրականացրել փորձագիտական հետազոտություն։ Կառավարությունն է բերել այս նախագիծը, այդ թիվը վեր է հանվել փորձագիտական խմբերի ուսումնասիրության արդյունքում»։

Մանրամասները՝ տեսանյութում։