Սերժ Սարգսյանը պիտի բացահայտի՝ ինչո՞ւ Փաշինյանին հանձնեց իշխանությունը, ինչո՞ւ ինքը չլուծեց ԼՂ կոնֆլիկտը․ Նորայր Նորիկյան․ ՏԵՍԱՆՅՈՒԹ

ՀՀ երրորդ նախագահ Սերժ Սարգսյանն օրերս ընթերցողին է հանձնել «Բանակցային առաջնագծում» վերնագրով գիրքը, որը, ենթադրվում է, անդրադառնում է նրա նախագահության տարիներին ՀՀ արտաքին քաղաքականությանը։

Factor TV-ին տված հարցազրույցում դեռ ամիսներ առաջ երջանկահիշատակ Արմեն Խարազյանը՝ ԱՄՆ-ում ՀՀ նախկին փոխդեսպանը, կոչ էր անում ՀՀ նախկին նախագահներին՝ անկեղծ խոստովանել, թե դրսից, մասնավորապես՝ Կրեմլից ի՞նչ սպառնալիքներ և ճնշումներ են եղել իրենց հանդեպ, և սուվերենության ի՞նչ բաղադրիչներ է զիջել ՀՀ-ն դրա դիմաց։

«Արդար Հայաստան» կուսակցության ղեկավար Նորայր Նորիկյանին Factor TV-ին տված հարցազրույցում հարց ուղղեցինք՝ ինքը ի՞նչ հարցերի պատասխաններ կցանկանար գտնել Սերժ Սարգսյանի գրքում և, ընդհանրապես, երրորդ նախագահն ի՞նչ հարցերի պիտի պատասխանի։

«Սերժ Սարգսյանը, եթե իսկապես մտահոգ է կամ իսկապես ասելիք ունի մեր ժողովրդին, մի շատ կարևոր հարցի պատասխան պետք է տա։ Ես հիշում եմ՝ 2020-ի նոյեմբերի 9-ից հետո, կարծեմ՝ «Վալդայ» ակումբում, ՌԴ նախագահն այսպիսի ձևակերպում արեց, որ ԼՂ-ի անկախությունն անգամ ՀՀ-ն չէր ճանաչել։ Ես կակնկալեմ, որ Սերժ Սարգսյանը երբևէ խոստովանի կամ ներկայացնի հայ հանրությանը՝ արդյո՞ք իր իշխանությունը ունեցել է մտադրություն Արցախի անկախությունը ճանաչելու, և արդյո՞ք ՌԴ-ն երբևէ խանգարել, նպաստել կամ խոչընդոտել է Արցախի անկախության ճանաչման՝ ՀՀ քաղաքական վերնախավի նկրտումներին կամ ձգտումներին»,- ասաց Նորիկյանը։

Նա ակնկալում է նաև Սերժ Սարգսյանից ասել՝ ինչո՞ւ ինքը, որպես հաղթած երկրի նախագահ, չգնաց ԼՂ-ի կոնֆլիկտի լուծմանը, ինչո՞ւ առանց մեկ փամփուշտի իշխանությունը հանձնեց Նիկոլ Փաշինյանին։

Հարցազրույցն ամբողջությամբ՝ տեսանյութում։

Ռոբերտ Անանյան