«Ղարաբաղի լինել- չլինելը կապված է Բակո Սահակյանի հեռացման հետ»․ Արցախի նախկին պատգամավոր. ՏԵՍԱՆՅՈՒԹ

Արցախի խորհրդարանի առաջին գումարման պատգամավոր, նախկին դաշնակցական, այժմ «Լույս Արցախին» նախաձեռնության անդամ Գրիշա Հայրապետյանը Factor.am-ի հետ զրույցում նշեց, որ Արցախում ևս անհապաղ փոփոխություններ են անհրաժեշտ, իսկ դրա համար ներկա նախագահ Բակո Սահակյանի վարչախումբը պետք է հեռանա՝ իր գլխավորությամբ։

Հիշեցնենք, որ վերջին հարցազրույցում Արցախի նախագահը հայտարարեց, թե չի պատրաստվում առաջադրվել 2020 թվականին՝ ակնակելով, որ ուզում է մինչ այդ շարունակել պաշտոնավարումը։

Չնայած Արցախի իշխանական վերնախավի վերջին հրաժարականներին, «Լույս Արցախին» նախաձեռնությունը պահանջում է Բակո Սահակյանի անհապաղ հրաժարականը. «Բակո Սահակյանն ու իր կողմնակիցները միանշանակ նշանակվել են Սերժ Սարգսյանի կողմից, որովհետև Սերժ Սարգսյանի համար Բակո Սահակյանը երևի ամենաընդունելին էր, որ իր քաղաքականությունը վարեր Արցախում։ Եվ ճիշտ այդ քաղաքականությունը Բակոն տարիներ շարունակ վարում էր Արցախում»։

Ըստ Արցախի նախկին պատգամավորի՝ Արցախում ձևավորվել է նույն կոռումպացված համակարգը՝ իր բոլոր թերություններով և հաջողություններով։ «Անթույլատրելի է, որ հայրենիքի մի մասում ցնծություն լինի, ժողովուրդն ապրի այլ ձևով, մյուս մասը մնա հին կարգավիճակով, անթույլատրելի է։ Եվ սա է հիմնական նպատակը «Լույս Արցախին» նախաձեռնության, որ պետք է պարտադիր կերպով ամեն ինչ փոխվի, որովհետև այս քաղաքականությունը, որ վարվում էր Արցախում, ոչ միայն անտանելի է, դա նույնիսկ մեր ազգային անվտանգության հարցն է դրված էսօր։ Բակո Սահակյանի մնալ-չմնալը կապված է Ղարաբաղի լինել-չլինելու հարցի հետ»,- ասաց Հայրապետյանը։

Նա նաև հույս հայտնեց, որ թավշյա հեղափոխությունը, որ իրականացվեց Հայաստանում, «ավելի մեղմ ձևով կանցնի նաև Արցախով, որովհետև մեր ժողովուրդը լավ գիտակցում է, որ այնտեղ նույնիսկ էս հնարավորությունը չունեն 1 ամիս, 20 օր միտինգներ անելու»։

Գրիշա Բաղդասարյանը նաև հույս ունի․ որ Արցախի իշխանությունը «ամեն ինչ գիտակցում է, և այդ ամենը կփոխվի հանգիստ և ոչ ցավոտ»։

Մանրամասները դիտեք Գրիշա Հայրապետյանի հետ Factor.am-ի հարցազրույցում։

Մարինե Խառատյան