Դավիթ Բաբայանը՝ Շուշիի հարակից հատվածում ադրբեջանական անցակետի տեղադրման մասին

Շուշիի հարակից հատվածում անցակետի տեղադրման մասին տեղեկություն չկա։ Այս մասին Factor.am-ի հետ զրույցում հայտնեց Արցախի նախագահի խորհրդական Դավիթ Բաբայանը։

«Եթե խոսքը վերաբերում է իրենց օկուպացիայի տակ գտնվող տարածքներին, ապա այնտեղ նրանք ամեն ինչ էլ անում են»,- ասաց Բաբայանը։
Իսկ եթե խոսքը Բերձորի միջանցքում ադրբեջանական անցակետի մասին է, ըստ Բաբայանի, Արցախում շարունակում են այդ գաղափարը համարել անընդունելի։

«Դա նախևառաջ լինելու է առևանգման և ձերբակալման անցակետ, երկրորդ՝ դրա մասին նույնիսկ ստորակետ չկա 2020 թվականի այդ չարաբաստիկ հայտարարության մեջ»,- նշեց Բաբայանը։

Շուշիի հարակից հատվածում տրանսպորտային միջոցների համար ադրբեջանական հսկիչ անցակետի տեղակայման մասին գրառում էր արել ԱԺ «Պատիվ ունեմ» խմբակցության պատգամավոր Տիգրան Աբրահամյանը՝ հղում անելով ադրբեջանական ԶԼՄ-ներին։ Նրանից պարզաբանում ստանալ չհաջողվեց։

Իսկ Լաչինի միջանցքում անցակետ տեղադրելու մասին մյուխենյան հանդիպումից հետո հերթական անգամ խոսել էր Ադրբեջանի նախագահը։ Հայաստանի վարչապետ Նիկոլ Փաշինյանի և ԱՄՆ պետքարտուղար Էնթոնի Բլինքենի հետ հանդիպումից հետո ադրբեջանական լրատվամիջոցներին տված հարցազրույցում Ալիևը հայտարարել է, որ հայկական կողմին պաշտոնապես առաջարկել է հսկիչ անցագրային կետեր հիմնել և տեղադրել Լաչինի ու Հայաստանի միջև։ Դրան հաջորդել էր Հայաստանի արտաքին գործերի նախարարի պատասխանը, որ Լաչինի միջանցքի կարգավորումների վերաբանակցումը, այն էլ՝ ուժի գործադրման արդյունքում, Հայաստանի համար ընդունելի չէ։

«Մեր պատասխանը միանշանակ է՝ Լաչինի միջանցքի կարգավորումները բանակցված են, ստորագրված են, այդ թվում՝ Ադրբեջանի նախագահի կողմից, ես խոսում եմ նոյեմբերի 9-ի փաստաթղթի մասին»,- նշել էր Արարատ Միրզոյանը։

Շողիկ Գալստյան