Տիգրան Ավինյանը նախաձեռնության հետ կապ չունի․ Երևանի քաղաքապետարանը՝ Աջափնյակում փակցված պաստառի մասին

Երևանի ավագանու անկախ անդամ Էռնեստ Ավանեսովը երեկ Ֆեյսբուքում Տիգրան Ավինյանի լուսանկարով պաստառ էր հրապարակել՝ «Միակը, ով շենացնում է քաղաքը» գրությամբ։ Պաստառը, ըստ Ավանեսովի, փակցված է Երևանի Աջափնյակ վարչական շրջանում։ Նշենք, որ Տիգրան Ավինյանը «Քաղաքացիական պայմանագրի» քաղաքապետի թեկնածուն է։ 

Երևանի ավագանու ընտրությունների օրը դեռ հայտնի չէ, ուստի քարոզարշավ չի կարող լինել։ Ինչո՞ւ է Ավինյանի լուսանկարով պաստառը, որն ընկալվում է որպես նախընտրական քարոզարշավ, փակցվել Երևանի Աջափնյակ վարչական շրջանում։ 

Երևանի քաղաքապետարանի լրատվության վարչությունից Factor.am-ին հայտնեցին, որ պաստառը Տիգրան Ավինյանի հետ առնչություն չունի, նախընտրական քարոզարշավ չի մեկնարկել։

«Հավանաբար ինչ-որ մեկի անձնական նախաձեռնությունն է, որը որևէ կերպ մեկնաբանել կամ որակում տալ չենք կարող, որովհետև տեղեկություն չունենք՝ ով կամ ինչի համար է արել։ Տիգրան Ավինյանն այդ նախաձեռնության հետ կապ չունի։ Եթե Ավինյանի նախաձեռնությունը լիներ, ինչո՞ւ պիտի քաղաքի մի անկյունում լիներ։ Պաշտոնապես որևէ բան չի մեկնարկել»,- նշեցին քաղաքապետարանից։

Թեև նախընտրական քարոզարշավը չի սկսվել, սակայն հանրության համար Ավինյանն այն վաղուց է սկսել։ «Սուրմալու» առևտրի կենտրոնում տեղի ունեցած ողբերգական պայթյունից 3 օր անց Ավինյանն այցելել էր ողբերգության վայր՝ այն դեպքում, երբ որևէ պաշտոն չուներ։ Factor TV-ն Ավինյանից հետաքրքրվել էր՝ «Այստեղ է որպես քաղաքապետի թեկնածո՞ւ», ինչին ի պատասխան՝ Ավինյանը հաստատել էր․ «Ես այստեղ եմ որպես «Քաղաքացիական պայմանագիր» կուսակցոթյան վարչության անդամ, և  այո՛, որպես «Քաղաքացիական պայմանագիր» կուսակցության կողմից առաջադրվելիք քաղաքապետի թեկնածու»։

Դրանից հետո շատերը Տիգրան Ավինյանին մեղադրեցին պայթյունի վայրում քարոզարշավ սկսելու համար։ Դրանից կարճ ժամանակ անց՝ սեպտեմբերի 23-ին Տիգրան Ավինյանն ընտրվեց Երևանի փոխքաղաքապետ։ Նա ներկա է լինում Երևանում իրականացվող գրեթե բոլոր միջոցառումներին։

Արփի Հակոբյան