12.01.2025 | 16:47
2018 թ. հեղափոխությունից հետո ժողովրդի մղումներն իրականացնելու ճանապարհով գնալը կործանարար կլիներ մեր պետության համար. Փաշինյան
«Բուխարեստ 9»-ի երկրները՝ ՌԴ-ի դեմ համախմբվելու կարևորության մասին
Քաղաքականություն
23.02.2023 | 23:07
ԱՄՆ-ի նախագահ Ջո Բայդենը և ՆԱՏՕ-ի գլխավոր քարտուղար Յենս Ստոլթենբերգը չորեքշաբթի օրը Վարշավայում, մասնակցելով, այսպես կոչված, «Բուխարեստ ինը», կամ «B-9» երկրների գագաթնաժողովին, փորձում են նվազեցնել Մոսկվայի էքսպանսիոնիստական նկրտումների վերաբերյալ մտահոգությունները: Այս մասին գրում է «Ամերիկայի ձայն»-ը։
ՆԱՏՕ-ի նոր անդամների հետ համագործակցությունը սերտացնելու նպատակ ունեցող B9 անվանումը կրող խմբի գագաթաժողովի ժամանակ հյուրընկալ պետության` Լեհաստանի նախագահ Անջեյ Դուդան կարեւորեց ՆԱՏՕ-ի բոլոր անդամների միջեւ համագործակցության խորացումը:
ԱՄՆ-ի նախագահ Ջո Բայդենն էլ վերահաստատեց ԱՄՆ-ի հավատարմությունը B-9-ի երկրներին: Կայքը հիշեցնում է, որ սրանք այն երկրներն են, որոնք Սառը պատերազմի տարիներին գտնվել են Ռուսաստանի ազդեցության գոտում: Եվ ամենից շատ նրանք են անհանգստացած Մոսկվայի էքսպանսիոնիստական, այսինքն իր տարածքները եւ վերահսկողության սահմաններն ընդարձակելու նկրտումներով:
«Դուք մեր հավաքական պաշտպանության առաջնագիծն եք։ Եվ դուք բոլորից լավ գիտեք, որ Ուկրաինայում շարունակվող այս հակամարտությունը, սպառնում է ոչ միայն Ուկրաինայի, այլ նաեւ ամբողջ Եվրոպայի և ամբողջ աշխարհում ժողովրդավարական երկրների ազատությանը»,-ասել է Բայդենը:
Խմբի այս հանդիպումն անցկացվեց այն ժամանակ, երբ Մոսկվան սկսեց ապակայունացնող գործունեություն ծավալել Մոլդովայում: Ռուսաստանի նախագահ Պուտինը չեղյալ է հայտարարել Մոլդովայի տարածքային ամբողջականությունը հաստատող, 2012 թվականին կնքված հրամանագիրը:
Նշվում է, որ Մոլդովայի Մերձդնեստրի շրջանում, որը վերահսկում են ռուսամետ անջատողականները, տեղակայված են ռուսական անհայտ թվով ուժեր:
Պուտինը չի պատրաստվում որեւէ խաղաղության, հայտարարում է ՆԱՏՕ-ի գլխավոր քարտուղար Յենս Ստոլթենբերգը։ «Ընդհակառակը, նա պատրաստվում է ավելի երկար պատերազմի։ Այսպիսով, մենք պետք է պահպանենք և ուժեղացնենք մեր աջակցությունը Ուկրաինային: Մենք պետք է Ուկրաինային տանք այն, ինչ նրանց պետք է հաղթելու համար»,-ասել է ՆԱՏՕ-ի գլխավոր քարտուղարը եւ նորից շեշտել Ռուսաստանի դեմ համախմբվելու կարեւորությունը:
