03.07.2026 | 21:13
Ալեն Սիմոնյանը պարգևատրել է պատգամավորներին, ԱԺ աշխատակազմին
Ինչպես կքվեարկեն պատգամավորները հանուն Սևանա լիճը «կատաստրոֆիկ» վիճակի բերած «Սևան-Հրազդան կասկադի»
Հասարակություն
03.07.2017 | 20:05
Վաղը՝ հուլիսի 4-ին, ժամը 10:00-ին, Ազգային ժողովն արտահերթ նիստում կքննարկի ՀՀ կառավարության մշակած՝ «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» ՀՀ օրենքում լրացումներ կատարելու մասին» ՀՀ օրենքի նախագիծը, որով նախատեսվում է 2017թ-ին Սևանա լճից օրենքով սահմանված 170 մլն մ3 առավելագույն ջրառից բացի, 100 միլիոն խորանարդ մետր լրացուցիչ ջուր բաց թողնել:
Մի խումբ բնապահպաններ ԱԺ շենքի դիմաց բողոքի ակցիա կանցկացնեն՝ պատգամավորներից պահանջելով դեմ քվեարկել նախագծին:Այս մասին Factor.am-ի հետ զրույցում նշեց բնապահպան Ինգա Զարաֆյանը:
«Այսօր Տարածքային կառավարման, տեղական ինքնակառավարման, գյուղատնտեսության եւ բնապահպանության հարցերի մշտական հանձնաժողովի նիստ է տեղի ունեցել: Նիստում ՀՀԿ-ից և Ծառուկյան դաշինքից 6 պատգամավոր կողմ են քվեարկել նախագծին և միայն «Ելք» խմբացությունից Լենա Նազարյանը և ՀՅԴ-ից մեկ պատգամավոր դեմ են քվեարկել նախագծին»-մեզ հետ զրույցում տեղեկացրեց բնապահպանը:
Սևանի ջուրը բաց է թողնվում Հրազդան գետով, որի վրա էլ տեղակայված է «Սևան-Հրազդան կասկադը»՝ իր 7 հիդրոէլեկտրակայաններով: Ես ստույգ հղում եմ անում նախագծում նեկայացվող պատճառաբանությանը: Կարևոր չէ, թե ում է պատկանում «Սևան-Հրազդան կասկադը», բայց այն Սևանա լիճը բերել է կատաստրոֆիկ վիճակի»,- ընդգծեց բնապահպանը:
Նշենք, որ «Սևան-Հրազդան կասկադը» հանդիսանում է « Միջազգային էներգետիկ կորպորացիա» ընկերության սեփականությունը, որն էլ իր հերթին պատկանում է ռուսական «Ինտեր ՌԱՕ ԵԷՍ» ընկերությանը:
Բնապահպանը մտահոգություն հայտնեց, որ լճից լրացուցիչ ջրի բացթողնումն իրականում այնքան ոռոգման խնդիր չի լուծում, որքան ապահովում է Հրազդան գետի վրա տեղակայված ՀԷԿ-երի աշխատանքը:
Հավելենք, որ այսօր ԱԺ-ում ՀՀ բնապահպանության նախարար Արծվիկ Մինասյանն անդրադարձել է Սևանա լճից 100 միլիոն խորանարդ մետր լրացուցիչ ջուր բաց թողնելու մասին կառավարության որոշմանը՝ նշելով. «Օրենքը չի արգելում Սևանա լճից լրացուցիչ ջրառ իրականացնելը՚: Ինգա Զարաֆյանը, սակայն, չցանկացավ մեկնաբնել նախարարի խոսքը:
