29.11.2024 | 22:50
Գազալցակայանում պայթյունից տուժած քաղաքացու վիճակը ծանր է․ մանրամասներ
Ադրբեջանի ԱԳՆ-ն արձագանքել է Արարատ Միրզոյանին՝ նրան մեղադրելով «մանիպուլյացիաների» համար
Քաղաքականություն
23.02.2023 | 12:07
Պաշտոնական Բաքուն արձագանքել է ՀՀ ԱԳ նախարար Արարատ Միրզոյանի՝ նախօրեին Լյուքսեմբուրգի ԱԳ նախարար Ժան Ասելբորնի հետ ասուլիսում հնչեցրած հայտարարություններին։ Ադրբեջանի ԱԳՆ-ն, ինչպես միշտ, դիմում է կեղծիքների՝ նշելով, թե Հայաստանի ԱԳ նախարարը, իբր, զբաղված է «մանիպուլյացիաներով և խաղաղ գործընթացի շուրջ բանակցությունները խեղաթյուրելով»։
«Նկատի ունենալով սահմանային անցակետ ստեղծելու վերաբերյալ ադրբեջանական կողմի առաջարկը՝ կանխելու Լաչինի ճանապարհի չարաշահումները, Ադրբեջանի բնական պաշարների թալանը, ականների և զինամթերքի տեղափոխումը, երրորդ երկրների քաղաքացիների ապօրինի անցումը Ադրբեջանի տարածք՝ որպես ուժի կիրառում, Հայաստանը ևս մեկ անգամ ցույց է տալիս, որ շահագրգռված չէ Լաչինի ճանապարհի թափանցիկության ապահովմամբ»,- ասվում է հայտարարության մեջ։
Բաքուն նշում է, որ, իբր, «սա ցույց է տալիս, թե հայկական կողմի իրական մտադրությունը նրանում է, որ կրկնելով այն պնդումները, թե բողոքի ցույցերը հանգեցրել են «շրջափակման» և «լարված հումանիտար իրավիճակի», շարունակել ճանապարհն օգտագործել անօրինական նպատակներով, ինչը հակասում է 2020 թվականի նոյեմբերի 10-ի եռակողմ հայտարարությանը»։
Նշենք, սակայն, որ ՄԱԿ-ի Արդարադատության միջազգային դատարանն իր որոշմամբ արդեն իսկ փաստել է, որ Բաքուն փակել է Լաչինի միջանցքը՝ ստեղծելով հումանիտար լարված իրավիճակ և պարտավոր է բացել այն՝ համաձայն 2020 թվականի նոյեմբերի 9-ի եռակողմ հայտարարությամբ ստանձնած պարտավորության։
«Ինչ վերաբերում է Ադրբեջանի Ղարաբաղի տարածաշրջանի հայ բնակիչների իրավունքներին ու անվտանգությանը վերաբերող միջազգային մեխանիզմի վերաբերյալ Հայաստանի առարկություններին, ինչպես նաև հայ բնակիչների հետ երկխոսության խնդրին, ուզում ենք նշել, որ ինչպես հստակորեն նշվել է Մյունխենի բանակցություններում՝ տարածաշրջանում բնակվող հայազգի բնակիչների իրավունքներն ու անվտանգությունը կապահովվեն Ադրբեջանի Հանրապետության Սահմանադրությանը և օրենսդրական ակտերին համապատասխան։ Ադրբեջանական կողմը նաև հայտարարել է, որ պատրաստ է երկխոսել ոչ թե դրսից Ղարաբաղ ժամանած և իրենց որպես հայ բնակիչների ներկայացուցիչ ներկայացրած անձանց հետ, այլ այն ներկայացուցիչների, որոնք, ինչպես նախկինում, իրավունք ունեն ներկայացնելու հայ բնակիչներին»,- ասվում է հայտարարության մեջ։
Էմմա Չոբանյան
