11.04.2026 | 22:24
Այցելել եմ երեկվա ողբերգական վթարից տուժած փոքրիկներին․ Ավանեսյան
Մոլդովան ցանկանում է երկրում ԵՄ քաղաքացիական առաքելություն տեղակայել՝ որպես անվտանգության քաղաքականության մաս
Քաղաքականություն
21.02.2023 | 18:37
Մոլդովայի իշխանությունները քննարկում են երկրում ԵՄ քաղաքացիական առաքելության տեղակայման հարցը՝ անվտանգության քաղաքականության շրջանակում։ Երկրի արտաքին գործերի և եվրաինտեգրման նախարար Նիկոլաե Պոպեսկուն հայտնել է, որ այս հարցը քննարկվել է Բրյուսելում Եվրոպական արտաքին գործողությունների ծառայության (ԵԱԳԾ) գլխավոր քարտուղար Ստեֆանո Սանինոյի հետ հանդիպմանը։
«Մենք քննարկել ենք անվտանգության ամրապնդման գործիքները ներքին գործերի հարթությունում, այդ թվում՝ քաղաքացիական առաքելության միջոցով, խորհրդատվական մանդատով ԵՄ անվտանգության և պաշտպանության ընդհանուր քաղաքականության շրջանակում, բարձրացնելու մեր երկրի՝ ընթացիկ մարտահրավերներին արձագանքելու կարողությունը»,- գրել է Պոպեսկուն իր Telegram-ալիքում։
Նրա խոսքով՝ Մոլդովայի իշխանությունները կարծում են, որ երկիրը պետք է ակտիվացնի համագործակցությունը ԵՄ-ի հետ անվտանգության և պաշտպանության ոլորտում։
ԵՄ արտաքին քաղաքականության ղեկավար Ժոզեպ Բորելը նախօրեին ասել էր, որ Բրյուսելն ուսումնասիրում է Մոլդովա առաքելություն ուղարկելու հնարավորությունը՝ անվտանգության և պաշտպանության ընդհանուր քաղաքականության շրջանակներում։ Ըստ նրա՝ այն պետք է աջակցի Մոլդովային որպես ԵՄ թեկնածու և մեծացնի նրա դիմակայունությունն արտաքին միջամտությանը և ապակայունացնող ջանքերին։
Տաթև Ֆռանգյան
