Հաղորդաշարեր
19.02.2023 | 19:00«Բոլոր մեծերը դուրս պետք է լինեն տարվանից, բացի այդ` միայն ընթերցումը բավական չէ. Թումանյանի գործերով պետք է դաստիարակվենք, այդ գիտակցությամբ աշխարհայացք ձևավորենք, պետք է դա դարձնենք սեփական գործելաոճի հիմնական ձև»,- Factor TV-ի հետ զրույցում նման տեսակետ է հայտնում Հովհաննես Թումանյանի թանգարանի տնօրեն Անի Եղիազարյանը` անդրադառնալով վարչապետ Նիկոլ Փաշինյանի ամանորյա ուղերձի այն հատվածին, որտեղ վերջինս ասում է, որ 2023-ը հայտարարում է Թումանյանի և Չարենցի ռազմավարական գործերի ընթերցման տարի:
Փետրվարի 19-ին նշում ենք Ամենայն հայոց բանաստեղծի` Հովհաննես Թումանյանի ծննդյան 154-ամյակը: Թանգարանի տնօրենի խոսքով` վերջին 15 տարում Թումանյան հրապարակախոսի մասին սկսել են շատ խոսել, ինչը ողջունելի է, բայց բավարար չէ: Անի Եղիազարյանն անդրադառնում է նաև Թումանյան հասարակական գործչի կերպարին. «Նա իր ժամանակին ոչ միայն իմաստունի պես փիլիսոփայական խոհեր էր արտահայտում, այլև նրա կյանքն ուղիղ բխում էր այդ օրերի ապրածից: Առհասարակ, Թումանյանն առաջ քաշեց կարևորագույնը` քաղաքացու ձևավորման հարցը: Այսօր էր հանրությունն ունի մտավորականների, հանրության կողմից միանշանակ ընդունվող կերպարների կարիք, որոնք օրհասական պահերին կլինեն ժողովրդի կողքին և դուրս ու բարձր կլինեն ամենատարբեր խմբավորումներից»:
Անի Եղիազարյանը խոսում է նաև թանգարանային հարցերից, Երևանի Հովհաննես Թումանյանի թանգարանի գործունեությունից, շենքային պայմաններից. «Այն պայմանները, որ ունենք թանգարանում, հարիր չեն Թումանյանին, նա պատշաճ միջավայրի է արժանի: Կան բազմաթիվ նախաձեռնություններ, որոնք թանգարանը հարկադրված հետաձգում է առկա պայմաններից ելնելով:
Օրինակ` թանգարանը տարիներ շարունակ կազմակերպում է միջազգային գիտաժողովներ, սակայն երբեմն հարկադրված տարբեր սրահներ է վարձակալում: Շենքն ունի արտաքին գրավչություն, սակայն ներքին ոչ պատշաճ հարդարանքի, պայմանների սղության խնդիր կա: Ամեն դեպքում, աշխատում ենք չափազանց փոքր աշխատակազմով, բայց մեծ նվիրումով»:
Մանրամասները` տեսանյութում:
Աննա Բաբաջանյան
