Ալեն Սիմոնյանի եղբայրը նոր ՓԲԸ է հիմնել․ այն ղեկավարում է եղբոր մանկության ընկերը․ ՏԵՍԱՆՅՈւԹ

ԱԺ նախագահ Ալեն Սիմոնյանի՝ ասֆալտապատման աշխատանքների կազմակերպմամբ հայտնի եղբայրը՝ Կառլեն Սիմոնյանը, նոր ընկերություն է հիմնել։ Factor.am-ն իրավաբանական անձանց պետական ռեգիստրից տեղեկացավ, որ Կառլեն Սիմոնյանը 2022 թվականի դեկտեմբերի 22-ին հիմնել է «Դիլս» ՓԲԸ-ն։ Դրա կառավարումն իրականացնում է «Փարվանյան Քոնսալթինգ» ՍՊԸ-ն։ Այս ընկերության սեփականատերն էլ Մհեր Փարվանյանն է, որը Կառլեն Սիմոնյանի մանկության ընկերն է, միաժամանակ, հանդիսանում է «Դիլս» ՓԲԸ-ի համահիմնադիրը։ Մեզ հաջողվեց հեռախոսով զրուցել Փարվանյանի հետ։ «Իմ և Կառլեն Սիմոնյանի հարաբերությունները նոր են դառնում գործընկերային, ես և նա մանկության ընկերներ ենք»,- ասաց նա։

Թե ի՞նչ գործունեություն է ծավավելու ԱԺ նախագահի եղբոր ընկերությունը, առայժմ չի հստակեցվում։ ԱԺ նախագահի եղբայրը՝ Կառլեն Սիմոնյանը, «Եվրոասֆալտ» ընկերության գործադիր տնօրենն է։ Ասֆալտապատման աշխատանքներով զբաղվող այս ընկերությունը պարբերաբար հաղթող է ճանաչվում պետական գնումների մրցույթներում։ Ընկերությունը հիմնադրվել է հեղափոխությունից հետո։

Նշենք, որ «Փարվանյան Քոնսալթինգ» ՍՊԸ-ի մասնաբաժինը, ըստ իրավաբանական անձանց պետական ռեգիստրի տվյալների, արգելանքի տակ է, մինչդեռ Մհեր Փարվանյանը Factor.am-ին փոխանցեց, որ ընկերությունը որևէ խնդիր չունի, ներկայումս նման բան գոյություն չունի և պետական ռեգիստրի գործակալության կայքում տվյալները հին են և թարմացված չեն։ Կառլեն Սիմոնյանի մանկության ընկերոջը պատկանող «Փարվանյան Քոնսալթինգ» ՍՊԸ-ն գործում է արդեն 10 տարի, հիմնադրվել է 2013 թվականին։ Մհեր Փարվանյանը 2019-ից է այս ընկերության սեփականատերը, մինչ այս՝ հիմնադիրը եղել է Փարվանյանի հետ փոխկապակցված անձ։

Ալեն Սիմոնյանի եղբոր ընկերոջը պատկանող «Փարվանյան Քոնսալթինգ» ՍՊԸ-ն պետական կառույցներին նաև ծառայություններ է մատուցում։ Ըստ պետական գնումների armeps համակարգի՝ այս ընկերությունը 2019 թվականին երկու պայմանագրով ընդհանուր 1 մլն 240 հազար դրամի իրավաբանական և ֆինանսական խորհրդատվություն է մատուցել «Որոտանի ՀԷԿՀ» ՓԲԸ-ին։ «Փարվանյան Քոնսալթինգ» ՍՊԸ-ն 2020 թվականից 18 տոկոս բաժնեմաս ունի «ԲԻ ԷՄ ՓԻ» ՍՊԸ-ում։ Ընկերության 65 տոկոսի սեփականատերը Փարվանյանի հետ նույն հասցեում հաշվառված մեկ այլ անձ է։ Այս ընկերությունը 2017-2020 թվականներին, ըստ armeps համակարգի, երեք պայմանագիր է կնքել պետական գերատեսչություններին հետ, որոնց արժեքը շուրջ 4 մլն դրամ է կազմել։

Պայմանագրերից մեկով ընկերությունը ՊՆ-ին գրքեր է մատակարարել, իսկ մյուսով՝ խորհրդատվական ծառայություն մատուցել «Որոտանի ՀԷԿՀ» ՓԲԸ-ին։ «ԲԻ ԷՄ ՓԻ» ՍՊԸ-ի բաժնեմասի օտարման մասով առկա է արգելանք։ Կառլեն Սիմոնյանի հետ փոխկապակցված Մհեր Փարվանյանի «Փարվանյան Քոնսալթինգ» ՍՊԸ-ն իրականացնում է նաև մի շարք ընկերությունների կառավարում, որոնք հիմնադրվել են 2022 թվականի ընթացքում։ Խոսքը, մասնավորապես, «Սպորտ Օնլայն» և «ՄԻԿՕԻԼ-ԷՄ» ՍՊԸ-ների մասին է․ վերջինի սեփականատերը Բելառուսի քաղաքացի է։ Այս ընկերությունը զբաղվում է միջպետական բեռնափոխադրումներով։

Կառավարման հանձնված ընկերությունների թվում են նաև Ռուսաստանի քաղաքացիների պատկանող «Դոլչե վիտա թրեվել», «Բլեքֆիլդ Կիլիկիա», «Տռաստ» ընկերությունները։

Մանրամասները՝ տեսանյութում։

Նարեկ Կիրակոսյան