Գյումրիի քաղաքապետարանը վաճառքի է հանել պատմական հուշարձան համարվող շենքը

Գյումրու պատմական կենտրոնում գտնվող «Ճերմակ հիվանդանոցի» շենքը աճուրդով կվաճառվի։ Մեկնարկային գինը, ըստ քաղաքի գլխավոր ճարտարապետ Հենրիկ Գասպարյանի, սահմանված է 1 միլիարդ 100 միլիոն դրամ։

Ճարտարապետի ասելով, շենքը քայքայվում է, պահպանման մեծ ծախսեր են պահանջվում, հետևաբար՝ որոշում է կայացվել այն հանձնել մասնավոր ներդրողի։ Շենքը նախկինում տրվել է վարձակալության, պայմանագրերի ժամկետը լրացել է, այժմ ազատ է։

Պատմական հուշարձան համարվող այս շենքի աճուրդ-վաճառքին, սակայն, դեմ են Գյումրիի ավագանու «Զարթոնք» և «Ապրելու երկիր» խմբակցության ղեկավարներ Վարդևան Հակոբյանը և Կարեն Մալխասյանը։

«Զարթոնք» խմբակցության ղեկավար Վարդևան Հակոբյանի համոզմամբ, անշարժ գույքի գնահատումը ժամկետանց է, կատարվել է 2022 թվականի հունիսին, մինչդեռ Գյումրիում անշարժ գույքի գներն օր օրի թանկանում են։ Բացի այդ, ըստ նրա, շենքը վաճառելով՝ քաղաքապետարանը կհայտնվի դատական պրոցեսների մեջ․ շենքի մի հատվածը երկարաժամկետ վարձակալության է տրված «Կարմիր Խաչ» ընկերությանը։

«Ապրելու երկիր» խմբակցության ղեկավար Կարեն Մալխասյանի կարծիքով էլ՝ հուշարձան համարվող շենքը օտարելը չի բխում Գյումրու շահերից։

Անցած տարի այն վարձակալությամբ վերցնելու պատրաստակամություն էին հայտնել երեք ներդրողներ, որոնք, ըստ Կարեն Մալխասյանի, պատրաստ էին և՛ շենքը վերանորոգել՝ ճարտարապետական տեսքը պահպանելով, և՛ վարձավճար տալ։

Ըստ նրա, կարելի է մեկ տարվա ընթացքում վարձակալության հանձնել, պահպանման ավելորդ ծախսեր չանել, գույքն էլ թողնել համայնքին։

Արմիկ Մովսիսյան