Վրաստանը շեղվել է եվրաինտեգրման ճանապարհից. Շտեֆան Մայստեր

Գերմանիայի արտաքին քաղաքականության միության Արևելյան Եվրոպայի, Ռուսաստանի և Կենտրոնական Ասիայի հետազոտությունների ղեկավար Շտեֆան Մայստերը կարծում է, որ Վրաստանի իշխանությունները շեղվել են անդրատլանտյան և եվրոպական ինտեգրման ճանապարհից, փոխանցում է Գրուզիա օնլայնը։

«Նրանց գործողությունները ԶԼՄ-ների դեմ, օրենքի գերակայության թուլացումը, իսկ այժմ «Օտարերկրյա գործակալների մասին» օրինագիծը քննադատորեն են դիտարկվում Բրյուսելում և ԵՄ անդամ երկրներում, քանի որ դրանք, ի վերջո, խաթարում են եվրոպական ինտեգրման հիմնական բաղադրիչները: Օտարերկրյա ազդեցության մասին օրենքն ավելի մոտ է ռուսական պրակտիկային, որը ձգտում է նվազագույնի հասցնել միջազգային շփումները և քաղաքացիական հասարակության ֆինանսավորումը: Ամեն ինչ կապված է հասարակության վերահսկման և մեկուսացման հետ»,- նշել է Մեյստերը «Օտարերկրյա ազդեցության գործակալների» օրինագծի վերաբերյալ Վրաստանի Քաղաքական ինստիտուտի (GIP) փորձագիտական գնահատականում:

Ըստ նրա՝ ակտիվ քաղաքացիական հասարակությունը և միջազգային շփումները կենսական նշանակություն ունեն Վրաստանի եվրաինտեգրման համար։ Բազմաթիվ միջոցառումներ ֆինանսավորվում են դրսից, ինչը կարևոր է մարդկային զարգացման, կրթության, միջազգային փոխանակման գործունեության, երիտասարդությանն աջակցելու համար, որոնք արդեն սահմանափակ են ռեսուրսներով:

Հավելենք, որ փետրվարի 14-ին «Ժողովրդի իշխանություն» շարժման անդամները, որոնք խորհրդարանական մեծամասնություն են կազմում, նախաձեռնել են Վրաստանի խորհրդարանում արտաքին ազդեցության թափանցիկության մասին օրենքի նախագիծ։ Օրենքով կստեղծվի օտարերկրյա ազդեցության գործակալների ռեգիստր, որը կներառի բոլոր շահույթ չհետապնդող իրավաբանական անձանց և լրատվամիջոցները, որոնց եկամուտը 20%-ից ավելի է ֆինանսավորվում «օտար ուժերի» կողմից։

Տաթև Ֆռանգյան