22.06.2026 | 12:18
Մոսկվային մոտեցող 70 ուկրաինական ԱԹՍ է խոցվել, օդանավակայանները դադարեցրել են աշխատանքը
Թուրքիայում սկսել են ձերբակալել շինարարության կապալառուներին
Քաղաքականություն
13.02.2023 | 23:30
Թուրքիայի իշխանությունները սկսել են ձերբակալել շինարարության կապալառուներին՝ կապված անցյալ շաբաթ տեղի ունեցած երկրաշարժի ժամանակ շենքերի փլուզման հետ: Մալաթիայի դատախազությունը որոշում է կայացրել ձերբակալել 31 անձի երկրաշարժերի ժամանակ փլուզված շենքերի հետաքննության շրջանակում, գրում է Gercek News-ը։
Այսօր Ստամբուլում ձերբակալվել է Գազիանթեփում փլուզված շենքի շինարարության մենեջեր և տեխնիկական ներկայացուցիչ Նազմի Թոսունը։ Ոստիկանությունը նաև կալանավորել է Հասան Ալփարգունին Հյուսիսային Կիպրոսում, երբ հարավային Ադանա նահանգում փլուզվել են նրա շինարարական ընկերության կողմից կառուցված մի քանի շենքեր:
Կապալառու Իհրահիմ Մուսթաֆա Ունջուօղլուն ևս կալանավորվել է Ստամբուլում այն բանից հետո, երբ Գազիանթեփ նահանգում բնակելի շենքի փլատակների տեխնիկական զննությամբ պարզվել է անփութություն և անորակ նյութերի օգտագործում։
Մերսինում ձերբակալվել է Շուքրու Իսիթմենը, որը պատասխանատու էր Ադըյամանի Բեսնի շրջանում վեց շենքերի փլուզման համար, որի հետևանքով մինչ այժմ 123 մարդ է զոհվել։
Ստամբուլի ոստիկանությունը ձերբակալել է մեկ այլ կապալառուի՝ Մեհմեդ Էրթան Աքային, երբ նրա կառուցած շենքը փլուզվել է Գազիանթեփում։ Դատախազությունն Աքային կալանավորելու որոշում է կայացրել՝ ոչ կանխամտածված սպանության և շինարարական կանոնները խախտելու մեղադրանքով։
Մինչ այդ, շաբաթ կալանավորվել էր նաև ծանր տուժած Հաթայ նահանգում բնակելի մեծ շենքի շինարարության կապալառու Մեհմեդ Յաշար Չոսքունը։ Ավելի վաղ անվտանգության ուժերը Չեռնոգորիայի ճանապարհին Ստամբուլի օդանավակայանում ձերբակալել էին Չոշքունին, որը փորձել էր փախչել Թուրքիայից։
Էմմա Չոբանյան
