Բեռլինը մատնանշել է ԼՂ հակամարտության վրա Ռուսաստանի բացասական ազդեցության սպառնալիքը

Գերմանիայի արտաքին գործերի նախարար Անալենա Բերբոքը մատնանշել է Ռուսաստանի բացասական ազդեցության սպառնալիքը Լեռնային Ղարաբաղի շուրջ ընթացող հակամարտության վրա։ Բեռլինում հստակորեն նկատում են Ռուսաստանի «ապակայունացնող ազդեցության մասին մտահոգությունները»։ Այս մասին Բերբոքն ասել է փետրվարի 7-ին ՀՀ արտգործնախարար Արարատ Միրզոյանի հետ Բեռլինում հանդիպումից հետո, փոխանցում է DW-ի ռուսական ծառայությունը։

Հարավային Կովկասում իրավիճակի կարգավորմանն ուղղված Գերմանիայի ջանքերն «ինքնանպատակ չեն, այլ ընդհանուր եվրոպական շահերի առարկա են», ընդգծել է գերմանացի նախարարը։ Նա հավելել է, որ Գերմանիայի կառավարությունը կարծում է, որ Ադրբեջանն ու Ռուսաստանը պարտավոր են միջոցներ ձեռնարկել վիճելի տարածաշրջանի ներկայիս շրջափակումը վերացնելու համար։

Բերբոքը մատնանշել է հունվարին ընդունված որոշումը՝ ԵՄ դիտորդական առաքելություն ստեղծելու վերաբերյալ, որը պետք է ապահովի «ավելի մեծ կայունություն և, առաջին հերթին, վստահություն ձևավորի» Բաքվի և Երևանի միջև։ Ընդ որում, խոսքը միաժամանակ կոնկրետ քայլերի մասին է, մասնավորապես՝ երկու կառավարությունների միջեւ հեռախոսային կապի ստեղծման։ Այս առաքելության զգալի մասը կկազմեն Գերմանիայի ներկայացուցիչները, առաքելությունը ևս գերմանացի կղեկավարի, ասել է Բերբոքը։

Նա ընդգծել է, որ Բեռլինն աջակցում է «ինչպես Հայաստանի, այնպես էլ Ադրբեջանի ինքնիշխանությանը և տարածքային ամբողջականությանը», իսկ ղարաբաղյան հակամարտության լուծումը «հնարավոր չէ գտնել միանգամից»։

Իր հերթին, Արարատ Միրզոյանը զրույցի ընթացքում Բաքվի իշխանություններին մեղադրել է 2020 թվականի նոյեմբերին Հայաստանի հետ կնքված համաձայնագիրը «ոտնահարելու» մեջ։ Նա հայտարարել է Լեռնային Ղարաբաղում «մարդասիրական աղետի» մասին՝ էներգիայի, սննդի ու դեղորայքի պաշարների պակասի պատճառով։ Բացի այդ, Միրզոյանը երախտագիտություն է հայտնել եվրոպացի գործընկերներին՝ Հարավային Կովկասում իրավիճակի կարգավորմանն ուղղված ջանքերի համար։

Տաթև Ֆռանգյան