«Ասեկոսեները խիստ չափազանցված են». բարեգործության օրինագծից բողոքող «Ծառուկյան դաշինքը» չի հեռանա Փաշինյանի կառավարությունից. ՏԵՍԱՆՅՈՒԹ

Չնայած «Բարեգործության մասին» օրենքի փոփոխության առթիվ ԱԺ ամբիոնից «Ծառուկյան» դաշինքի հնչեցրած խիստ քննադատությանը, նույն դաշինքի պատգամավոր, ԲՀԿ փոխնախագահ Սերգեյ Բագրատյանը Factor.am-ի հետ զրույցում վստահեցնում է, որ ԲՀԿ-ն Նիկոլ Փաշինյանի կառավարությունից հեռանալու մտադրություն չունի:

«Այդ ասեկոսեները խիստ չափազանցված են: Չկա նման մտայնություն: Կա առողջ քննարկելու ցանկություն»,- ասաց Բագրատյանը՝ հավելելով, որ իրենց համար անսպասելի էր այդ օրենքի «արագ և արտահերթ ռեժիմով քննարկելու ցանկությունը»:

ԲՀԿ-ում վստահ են, որ լեզու կգտնեն: «Ես վստահ եմ, որ համազգային այս ուժը հնարավորություն չունի սայթաքելու»,- շեշտեց ԲՀԿ փոխնախագահը: Միևնույն ժամանակ Սերգեյ Բագրատյանը օրինագծում ենթատեքստ է տեսնում: «Օրենքի մեջ ենթատեքստ եմ տեսնում «Գագիկ Ծառուկյան» բարեգործական կազմակերպությանն ուղղված»,- նկատեց Բագրատյանը՝ հավելելով, որ եթե կան թերություններ, իրենք պատրաստ են քննարկել:

«Իհարկե, անպայման մերժելու ենք բոլոր այդ թերությունները: Եկեք մտածենք, որ նախընտրական շրջանում ոչ մի բարեգործական ակցիա չիրականացվի»,- առաջարկեց ԲՀԿ-ական պատգամավորը՝ պնդելով, որ պատրաստ են ցանկացած քննարկման:

Մեր հարցին, թե արդյոք ԲՀԿ միակ կռվանը ընտրություններում բարեգործությո՞ւնն է լինելու, դրանով է այն տարբերվելու մյուսներից, և արդյոք չի՞ համարում, որ գյուղացիներին սերմացու կարտոֆիլ, «տուկի թել» կամ այլ ապրանքներ բաժանելով ընտրություններ անցկացնելու ժամանակներն անցել են, Սերգեյ Բագրատյանն ասաց. «Երեսուն տոկոս աղքատություն ունեցող երկիրը առանց բարեգործության իսկապես շատ ավելի ծանր վիճակում կհայտնվեր: Տարիներ շարունակ այդ բարեգործությունը չի դիտարկվել քաղաքական հաշվեկշռի խախտում: Ես մերժելով մերժում եմ որևէ տիպի ընտրակաշառք, դա այն ախտն էր, որ մեր երկրին ամենամեծ վնասը հասցրեց»:

ԲՀԿ ներկայացուցիչը նաև հիշեցրեց, որ այդ օրինագիծը հեղինակել է ՀՀԿ-ն, «որպեսզի ընդդիմությունը հնարավորություն չուենա օգնել հանրությանը ու ներկայանալ բարի գործով»:

Հստակեցմանը, թե ի վերջո օրինագիծը Գագիկ Ծառուկյանի դեմ է, ԲՀԿ փոխնախագահն ասաց. «Քավ լիցի, մենք մտավախություն ունենք, որ շատերը կարող են ընկալել այդպես»:

Այս օրերին նկատելի է, որ ԲՀԿ-ն ակտիվ երաշխավորում է քաղբանտարկյալների ու «Սասնա ծռերի» ազատ արձակման համար: Մեր հարցին, թե արդյոք ակնկալիք ունե՞ն, որ նրանք կաջակցեն ԲՀԿ-ին առաջիկա ընտրություններում, Բագրատյանն ասաց. «Մարդիկ են, ովքեր պայքարել են ռեժիմի դեմ, պետք է օգնել այդ մարդկանց, թե ոչ: Ակնկալում ենք, որ նրանք ժողովրդի կողքը կլինեն: Պետք չի ակնկալել անձնավորված: Պետք է օգնենք այս համաժողովրդական շարժմանը»:

«Ծառուկյան» դաշինքի ներկայացուցիչը ԱԱԾ-ի բացահայտումները «հրաշալի» է գնահատում, միևնույն ժամանակ մտավախություն չունի, որ բացահայտումները կարող են հասնել ԲՀԿ-ական նախկին պաշտոնյաներին:

Մանրամասները դիտեք Սերգեյ Բագրատյանի հետ Factor.am-ի հարցազրույցում:

Մարինե Խառատյան