ԲԱՆԱՎԵՃ․ Լավրովը ՀՀ-ին «օկուպանտ» կոչեց․ ԵՄ-ի, թե՞ ՀԱՊԿ-ի դիտորդներ․ պատերազմի բռնկման վտանգ․ ՏԵՍԱՆՅՈՒԹ

ՌԴ արտգործնախարար Սերգեյ Լավրովը Հայաստանին «օկուպանտ» է անվանում, որն ըստ նրա՝ նախկինում օկուպացրել էր Ադրբեջանի յոթ տարածքները։ Այսպես նա, ըստ էության, իր հարցազրույցում հիմնավորում էր ՀԱՊԿ-ի կրավորական կեցվածքը և ՀՀ-ի դեմ Ադրբեջանի ռազմական ագրեսիաների չդատապարտումը։ Այսօր հերթական անգամ Լավրովը ՀՀ-ին հիշեցրել է, որ ՀԱՊԿ-ի դիտորդները հայ-ադրբեջանական սահմանին կարող են տեղակայվել անհապաղ՝ մեկ-երկու օրվա ընթացքում։ Լավրովը պատմել է, թե  Հայաստանը ՀԱՊԿ-ի երևանյան խորհրդաժողովում պահանջում էր դատապարտել Ադրբեջանի գործողությունները, բայց ոչ բոլորն էին դրան պատրաստ․ «Քանի որ ղարաբաղյան խնդիրը տասնամյակների պատմություն ունի, նախկինում Հայաստանն էր օկուպացրել Ադրբեջանի 7 շրջանները»։

Արդյո՞ք ԼՂ-ին հարակից տարածքները վերահսկողության տակ պահելն իրապես բավարար փաստարկ էր, որ ՌԴ-ն և ՀԱՊԿ-ի մյուս երկրներն Ադրբեջանի ագրեսիան չդատապարտեին, ռազմական աջակցություն ցույց չտային ՀՀ-ին։ Թե՞ ՀԱՊԿ-ի շահերից իրականում չի բխում Ադրբեջանի դեմ քայլեր անելը, և իրենց անգործության մեջ մեղադրում են ՀՀ-ին։  Արդյո՞ք Հայաստանը պետք է վերանայի իր որոշումը, և ԵՄ-ի դիտորդների փոխարեն նախապատվությունը տա ՀԱՊԿ-ի դիտորդներին։

Այս թեմաների շուրջ Factor TV-ն բանավեճ է կազմակերպել, որին մասնակցում են «Վերելք» կենտրոնի վերլուծաբան Հայկ Խալաթյանը, քաղաքական վերլուծաբան Արմեն Հովհաննիսյանը, քաղաքագետ Գուրգեն Սիմոնյանը, «Ազատ քաղաքացի» ՀԿ ղեկավար Հովսեփ Խուրշուդյանը, «Բերդ» կրթական, ռազմահայրենասիրական ՀԿ անդամ Արփի Թոփչյանը։